Sultanov pen Myrzaǵalıev jańa mınıstrlikterdiń ujymymen tanysty
Úkimet basshysy Arystanbek Muhamedıulyna mádenıet, sport, týrızm salalarynyń damýyna qosqan úlesi úshin alǵys bildirdi.
«Arystanbek Muhamedıuly - tájirıbesi mol basshy. Mınıstr qyzmetinde bes jyl ishinde qarqyndy jumys istep, osy salanyń ózekti máselelerin sheshýge qatysty nátıjeli jumystardy atqardy», - dedi Asqar Mamın.
Óz kezeginde, A. Muhamedıuly QR Tuńǵysh Prezıdenti - Elbasy Nursultan Nazarbaevqa jáne Memleket basshysy Qasym-Jomart Toqaevqa atalmysh salany damytýdyń memlekettik baǵdarlamalaryn iske asyrýdaǵy ózine artylǵan senim men kórsetken qoldaýlaryna alǵysyn jetkizdi.
Asqar Mamın QR Mádenıet jáne sport mınıstrliginiń ujymyna jańa basshyny tanystyrý barysynda Aqtoty Raıymqulovanyń atalǵan saladaǵy joǵary biliktiligin atap ótti. Sondaı-aq vedomstvo aldyna qoıylǵan maqsattarǵa qol jetkizýde tabys tiledi. A. Raıymqulova Mádenıet jáne sport mınıstrliginiń qurylymynda 6 jylǵa jýyq ýaqyt jumys istep keledi. 2016 jylǵy qazannan bastap vıtse-mınıstr qyzmetin atqardy.
Asqar Mamın jańa QR Saýda jáne ıntegratsııa mınıstrliginiń ujymymen kezdesýde B. Sultanovtyń basshylyq qyzmetterdegi kópjyldyq jumys tájirıbesin atap ótti.
«B. Sultanovtyń jańa memlekettik organnyń jumysyn uıymdastyrýǵa jáne qoıylǵan mindetterdi sapaly oryndaýǵa qajetti mol tájirıbesi bar», - dedi A. Mamın.
QR Premer-Mınıstri onyń Memleket basshysynyń úlken senimin aqtap, jańa mınıstrliktiń aldynda turǵan mańyzdy mindetterdiń sapaly oryndalýyn qamtamasyz etetinine senim bildirdi.
Sondaı-aq Úkimet basshysy Ekologııa, geologııa jáne tabıǵı resýrstar mınıstri Maǵzum Myrzaǵalıevti tanystyra otyryp, onyń joǵary biliktiligi men jumys tájirıbesin atap ótti.
«Prezıdent Sizge, óte mańyzdy baǵytty basqarýdy jáne jańa memlekettik organnyń jumysyn uıymdastyryp, qoıylǵan mindetterdi oryndaýdy senip tapsyrdy», - dep atap ótken Asqar Mamın, barlyq uıymdastyrý máselelerin jedel sheshýdi jáne jumysqa kirisýdi tapsyrdy.