Sultanov munaıdan túsetin kiristi jınaqtaý jolyn aıtty

ASTANA. QazAqparat - 2020 jyldan bastap respýblıkalyq bıýdjetke kepildendirilgen transfert absolıýttik shama teńgede tirkeledi. Bul týraly Senatta «Teńdestirilgen jáne ashyq bıýdjet - eldiń tabysty jáne ornyqty áleýmettik-ekonomıkalyq damýynyń kepili» atty parlamenttik tyńdaýda QR Qarjy mınıstri Baqyt Sultanov málim etti, dep habarlaıdy QazAqparat.

«Bolashaq urpaq úshin munaıdan túsetin kiristi jınaqtaý maqsatynda 2020 jyldan bastap respýblıkalyq bıýdjetke kepildendirilgen transfert absolıýttik shama teńgede tirkeledi. Sonymen birge jańa erejege birqalypty aýysý úshin Ulttyq qordan kepildendirilgen transferttiń mólsheri kezeń-kezeńmen tómendetiledi. ıAǵnı 2018 jyly - 2 trln. 600 mlrd. teńge; 2019 jyly - 2 trln. 300 mlrd. teńge; 2020 jyly jáne aldaǵy kezeńde - 2 trln. teńge», - dedi B. Sultanov.

Munymen qosa mınıstr orta merzimdi perspektıvada jalpy ishki ónimge qaraǵanda bıýdjet tapshylyǵyn 1 paıyzǵa deıin tómendetý josparlanyp otyrǵanyn, bul óz kezeginde el ekonomıkasynyń syrtqy faktorǵa táýeldiligin tómendetip, qaryzǵa qyzmet kórsetý boıynsha bıýdjetke júktemeni azaıtatynyn atap ótti.