Sultanov memlekettik satyp alý rásimderine vıdeobaqylaýdyń jemisi týraly aıtty

ASTANA. QazAqparat - Qazaqstanda memlekettik satyp alýdyń rásimderine kameralyq baqylaý jasaýdyń arqasynda 180,7 mlrd teńgelik zańnamaǵa qaıshy keletin qorytyndy sheshimderdiń kúshi joıylǵan. Bul týraly búgingi Úkimet otyrysynda Qarjy mınıstri Baqyt Sultanov málim etti, dep habarlaıdy QazAqparat tilshisi.

 «Aýdıtorlyq qyzmetke kóshkennen beri bizdiń profıldik komıtet josparly tekserýlerdiń ornyna táýekeldi basqarý júıesin qoldanýdy bastap ketti. Máselen, eseptik kezeńde 678 tekserý júrgizildi. 149,5 mlrd teńgeniń buzýshylyqtary anyqtaldy. Onyń 112,6 mlrd teńgesi protsedýralyq buzýshylyqtar bolsa, 36,9 mlrd teńgesi - qarjylyq. Qarjylyq buzýshylyq 2017 jyldyń tıisti kezeńimen salystyrǵanda 82 paıyzǵa azaıdy», - dedi 2018 jyldyń І toqsanyndaǵy memlekettik aýdıt salasyndaǵy jumys qorytyndylary týraly baıandama jasaǵan Baqyt Sultanov.

Mınıstrdiń aıtýyna qaraǵanda, buzýshylyqtardy azaıtýdyń birden-bir quraly - memlekettik satyp alýdyń rásimderine kameralyq baqylaý jasaý.

«Kúndelikti osy baqylaý arqyly satyp alýdyń júzdegen táýekeldi protsedýralary onlaın-rejimde qaralady. Sonymen, osy úsh aıdyń ishinde memlekettik satyp alýdyń 192 myń rásimi osyndaı «súzgige» tústi. Máselen, satyp alýǵa qatysýshylarǵa shekteý men qıyndyq týdyryp, konkýrsty belgili bir merdigerge arnap ótkizýge baılanysty 4 myńnan asatyn buzýshylyqtarǵa jol berilmedi. Nátıjesinde 180,7 mlrd teńgege memlekettik satyp alýdyń zańnamaǵa qaıshy keletin qorytyndy sheshimderi kúshin joıdy», - deıdi Baqyt Sultanov.

foto:infinica.ru