Sultanáli Balǵabaev Toqaevtyń on mańyzdy baǵyty týraly: Mamandy sapaly daıarlaýǵa kóńil bólinýi kerek

ALMATY. QazAqparat - Prezıdenttiń ulyqtaý rásiminde qoıǵan mindetteriniń ishindegi mańyzdysy - jastardy tárbıeleý sheshimi kezek kúttirmeıtin másele. Al bul baǵytta ult bolashaǵyna balta shabatyn indetterden arylý kerek. Osyndaı pikirdi T.Júrgenov atyndaǵy Óner akademııasynyń professory, jazýshy Sultanáli Balǵabaev bildirdi, dep habarlaıdy QazAqparat tilshisi.

Sultanáli Balǵabaev el basshylyǵyna Qasym-Jomart Toqaevtyń kelgenine qatysty da oıyn bildirdi. Onyń paıymynsha, bul Qazaqstannyń damý dárejesin burynǵydan da jańa deńgeıge kóterýge septigin tıgizedi.

«Dúnıejúzi qazaqtary qaýymdastyǵynda biraz jyldar jumys istedim. Sol kezde baıqaǵanym, el basqaryp otyrǵan azamattardyń kóbi sheteldegi jaǵdaıdy bile bermeıdi. Biz naryqtyq ekonomıkaǵa ótkende sheteldik jaǵdaımen salystyrǵanda kenje qalyp qoıǵan edik. Sol kezde «bar salaǵa shet eldi jaqsy biletin adam kelse» dep armandaıtynmyn. Elbasynyń ózi Qasym-Jomart Toqaevqa ornyn usyndy, keıin halyq ony saılady. Sondyqtan, Qasym-Jomart Toqaevtyń Prezıdent bolyp saılanýyna baılanysty Qazaqstannyń damý dárejesi burynǵydan da jańa deńgeıge kóteriledi dep senemin. Eń aldymen Toqaev ozyq memlekettik basqarýdy uıymdastyrý, naryqqa beıimdeýdi júrgizý jaǵynan tájirıbesin júzege asyryp, Qazaqstannyń damýyna yqpal etedi dep sanaımyn», - dedi Sultanáli Balǵabaev.

Spıker Prezıdenttiń ulyqtaý rásiminde jarııalaǵan 10 negizgi baǵytqa da toqtaldy. Bul rette Sultanáli Balǵabaev bılikke kelgen Prezıdenttiń aıqyndaǵan baǵdary durys ekenin atap ótedi.

«Prezıdent ulyqtaý rásiminde 10 túrli mindet alǵa qoıdy. Maǵan onyń ishinde, jumysyma, shyǵarmashylyǵyma baılanysty 8-i baǵyt boıynsha oıymdy jetkizsem dep edim. «Rýhanı jańǵyrý» qundylyqtary bizdiń basty rýhanı baǵdarymyz bolyp qala beredi. Tarıhqa qurmetpen qaraý, Otanǵa adal bolý, ǵylym-bilimge degen umtylys - munyń barlyǵy bizdiń halqymyzdyń boıyndaǵy asyl qasıetter. Bul qasıetter bizdiń halqymyzdyń birligin jáne ultymyzdyń jasampazdyǵyn nyǵaıtady, básekege qabiletti el bolýǵa jol ashady», - dedi S. Balǵabaev.

Sonymen qatar, ol el bolashaǵynda jastardyń úlken ról atqaratynyn da atap ótti. Onyń aıtýynsha, bul baǵytta da qyrýar jumystar atqarylýy tıis.

«Ózim ustaz bolǵan soń 15 jyl boıy jastardy kıno-dramatýrgııa salasynda tárbıelep kelemin. Qazirdiń ózinde 5-6 shákirtim, aldy Áýezov teatrynda qoıylym sahnalap júr. Osyndaı talantty jastarymyzdyń Qazaqstandy jańa deńgeıge kóterýge shamasy bar. Áıtse de, áli áttegen-aıymyz joq emes. Meniń oıymsha búginde mektepterde oqytýǵa kóp kóńil bólinedi de, JOO bilim sapasyna kóp mán berilmeıdi. Meni eń alańdatatyny kóptegen jekemenshik ýnıversıtetterdiń ashylyp alǵany. Aqsha alyp balaǵa tárbıe, bilim bermeıdi. Sapasyz maman daıyndaıdy. Jastardyń kóbi jumys taba almaı bosyp júr. Jaqynda oblystan bir jigit keldi. Ánshilikti oqypty, biraq nota bilmeıdi. Oblystaǵy bir ýnıversıtette aqshamen oqyp, 4 jyl sabaqqa barmaǵan. Osyndaı máseleler ult bolashaǵyna balta shabatyny ras. Prezıdenttiń alǵa qoıǵan mindetin oryndaý úshin JOO stýdentterine durys bilim berýge, olardy jumyspen qamtýǵa, tárbıeleýge kóńil bólinse, oǵan bilim beretin ustazdy jaýapkershershiligin aıryqsha qadaǵalaý kerek», - dedi Sultanáli Balǵabaev.

Eske sala keteıik, 12 maýsymda ótken ulyqtaý rásimi barysynda Qasym-Jomart Toqaev on mańyzdy baǵytyn jarııalaǵan bolatyn.