Sultan Ákimbekov: Ortalyq Azııa odaǵyn qurý - taza ıllıýzııa
Sebebi keńestik júıe ydyraǵaly beri aımaq memleketteri saıası-ekonomıkalyq jaǵynan túbegeıli ózgerdi, dep habarlaıdy QazAqparat tilshisi.
"Bul - taza ıllıýzııa. Sebebi bizde qarama-qaıshylyqtar kóp. Sonyń birazy sheshýge de kelmeıdi. Máselen, Qazaqstan men Ózbekstannyń ekonomıkalyq júıeleri múldem uqsamaıdy. Ekonomıkany uıymdastyrý sharalary da eki bólek. Sondyqtan ondaı formatta qandaı da bir odaq, ıa bolmasa, birlestikti qurý múmkin emes dep oılaımyn. Osy oraıda Tramptyń bir sózimen kelisemin. Kez kelgen jaǵdaıda ulttyq múdde máselesi joǵary turady. Birikkennen buryn ol odaqqa ne isteı alatynyńdy, ne bere alatynyńdy túsinip alý qajet", - deıdi Ákimbekov.
QazAqparat tilshisine suxbat bergen Sultan Ákimbekov Ortalyq Azııa elderiniń osy ýaqytqa deıin qalaısha ózgergenin, sondaı-aq bir odaq aıasynda birigýge kedergi bolatyn negizgi máselelerge toqtaldy. "Endi qarańyz, 25 jyl jaı ótken joq. Qazir Ortalyq Azııada ekonomıkany uıymdastyrýdyń eki modeli bar. Ol - memlekettik kapıtalızm jáne naryqtyq ekonomıka. Oǵan qosa, eki bólek saıası júıeler bar. Bárimiz 25 jyldyń ishinde qatty ózgerdik. Sondyqtan bizdi salystyrýǵa bolmaıdy. Máselen, búginde Ózbekstan bárin basqasha jasaımyz dep jatyr. Degenmen, eski júıe áli de bar. Al eski júıede aıaq tirep, jumysty jańasha qalaı júrgizýge bolady? Bizde taza naryqtyq ekonomıka. Bul - bizdiń basty aıyrmashylyǵymyz. Sol sebepti aldymen aımaqtyń ekonomıkasyn bir retke keltirip alaıyq. Artynan birigý máselesin de qarastyrýǵa bolady", - dep atap kórsetti sarapshy.
Aıta keteıik , búgin Astanada Qazaqstannyń strategııalyq zertteýler ınstıtýtynyń uıymdastyrýymen Ortalyq Azııadaǵy qaýipsizdik máselelerine arnalǵan jyl saıynǵy konferentsııa bastaldy. Bıylǵy konferentsııanyń taqyryby - "Jahandyq transformatsııa jaǵdaıyndaǵy Ortalyq Azııa". Jıynǵa Ózbekstan, Qyrǵyzstan, Qytaı men Reseıdiń sarapshylary qatysýda. Sol jerde depýtat Máýlen Áshimbaev Ortalyq Azııada jańa aımaqtyq birlestikti qurý máselesinqaıtadan kóterdi .
Al Qazaq-nemis ýnıversıteti janyndaǵy xalyqaralyq jáne aımaqtyq yntymaqtastyq ınstıtýtynyń dırektory Bolat Sultanov Ortalyq Azııanyń jańa odaǵyn "Túrkistan bestigi" etip qurýdy usyndy .