Sultan Ábdirahmanov: Dindegi qaýip - soqyr senim

ALMATY. QazAqparat – Qandaı din bolsyn senimderge negizdeledi. Bir qaraǵanda bul qarapaıym dúnıe bolyp kórinýi múmkin. QazUÝ oqytýshy, dintaný magıstri Sultan Ábdirahmanov osylaı málim etti, dep habarlaıdy QazAqparat.

Sarapshynyń aıtýynsha, qoǵamda bolyp jatqan dinı máseleler osy qarapaıym nárseden bastalýda.

«Tipti, jańadan ósip kele jatqan balanyń da dinı saýaty otbasynan ashylary sózsiz. Otbasynda din týraly áńgimelespeıtin adamdar dinı saýatyn syrttan jınaıdy.

Soqyr senim adamdardyn aqylyn tumshalap adasýyna ákep soǵýda. Sırııaǵa ketken qandastarymyzdyń jaǵdaıy - sonyń bir kórinisi. Din óte bir názik taqyryp bolǵandyqtan oǵan ústirt qaraýǵa bolmaıdy. Qazaq jastary jappaı dinge bet burǵany qýantarlyq nárse, alaıda jastarymyzdyń dindi durys túsine almaýy jáne soqyr senimge erýi kóptegen qıynshylyqtar týdyrýda», dedi Sultan Ábdirahmanov.

Onyń aıtýynsha, qylmystyq isterdiń deni Atyraý, Almaty, Aqtóbe, Ońtústik Qazaqstan, Pavlodar oblystarynda qaralǵan. Bul azamattardyń barlyǵy qarapaıym otbasylarda tárbıelengen.

«Soqyr senimge adamdar qalaı urynady? Qazirgi ýaqytta astarly túrde aqparattyq shaıqastar júrýde. Árbir adam qaı jerde bolsada ár túrli aqparattarǵa qol jetkize alady. Aqparattardy sol qalpynda qabyldaı berý, esh oı eleginen ótkizbeý saldarynan adamdar aldanyp, adasyp jatyr. «Naǵyz soqyr kókirek kózi soqyr adam» demekshi, aıtylǵan aqparattardy oı súzgisinen ótkizý - árbir kókirek kózi oıaý adamnyń mindeti. Soqyr senim saldarynan qanshama otbasynyń shańyraǵy shaıqaldy. Adamdardyń ómiri keıbir ıdeologııalardyń qýyrshaǵyna aınaldy», - dedi Sultan Ábdirahmanov.

Onyń pikirinshe, jalpy Qazaqstanda bolyp jatqan dinı máseleniń kópshiligi dinı saýatsyzdyq pen soqyr senimge tikeleı qatysty.

«Qazaqstannyń kez-kelgen azamaty ult qaýipsizdigi men el tynyshtyǵy maqsatynda Abaı aıtqandaı aqyryn júrip ańyq bassa quba qup», - dedi ol.