Súleımenov: 2018 jyly memlekettik tapsyrmalardy iske asyratyn nysandardyń satylýyn qamtamasyz etý qajet
Mınıstrdiń aıtýynsha, jekeshelendirýdiń keshendi josparyndaǵy barlyq nysandar 2018 jyldyń sońyna deıin satylýy tıis. Degenmen 2017 jyly memlekettik tapsyrmalardy oryndap jatqan jekeshelendirýge jatatyn birqatar uıymdar bar.
«Básekelestikti qamtamasyz etý jáne usynylatyn qyzmetterdiń sapasyn arttyrý maqsatynda memlekettik organdarǵa 2017 jylǵa arnalǵan memlekettik tapsyrmalar tizbesin túzetýge ýaqtyly bastamashylyq jasaý nemese 2018 jyly memlekettik tapsyrmalardy iske asyratyn nysandardyń satylýyn qamtamasyz etý qajet. Keıinnen, atalǵan uıymdar oryndaıtyn memlekettik tapsyrmalar konkýrstyq negizge aýystyrylýy tıis», - dep atap ótti ol.
Onyń sózine qaraǵanda, jekeshelendirýdiń ashyqtyǵy men tıimdiligin qamtamasyz etý, «KAZNEX INVEST» AQ-qa áleýetti ınvestorlar sanyn barynsha tartý maqsatynda qosymsha ınternet-resýrs www.privatization.gov.kz saıty qurylǵan. Onda jekeshelendirý nysandary jóninde aqparat usynylǵan jáne Jekeshelendirýdiń keshendi josparyn iske asyrý kórsetilgen.
«Atalǵan saıttyń aqparatpen jetkilikti tolyqtyrylmaı otyrǵanyn atap ótý qajet. Osyǵan baılanysty, Investıtsııalar jáne damý mınıstrligine, «KAZNEX INVEST» AQ-na múddeli memlekettik organdarmen jáne uıymdarmen birlesip, apta saıynǵy negizde jekeshelendiriletin nysandar týraly qazaq, orys, aǵylshyn tildegi aqparatty ózektilendirýdi qamtamasyz etý jóninde tapsyrma berýińizdy suraımyz», - dedi Súleımenov Úkimet basshysy Baqytjan Saǵyntaevqa qarata.