Sýquzǵyndar Pavlodar oblysyndaǵy balyq qoryn qurtyp jatyr
Balyq resýrstarynyń azaıýyna keıingi jyldary Ertis ózeni boıynda sýquzǵyndardyń qaptap ketkeni áser etip otyrǵany jasyryn emes.
Pavlodar oblysynyń jer qoınaýyn paıdalaný, qorshaǵan orta jáne sý resýrstary basqarmasynyń bas mamany Qanat Bazarbaı sýquzǵyndar sanynyń kúrt kóbeıip ketýine qatysty turǵyndar tarapynan shaǵym kóbeıip turǵanyn aıtady.
«Eresek sýquzǵyn jas balyqtardy qylǵyta salatyn jyrtqysh qus. Úlken balyqtardyń kóbeıýine de zııan keltiredi. Budan bólek úırek, qutan, birqazan jáne t.b. qustardyń tabıǵı kóbeıý protsesine teris áser etedi. 2022 jyly oblys aýmaǵyn 4616 sýquzǵyn mekendeıtini anyqtalsa, 2023 jyly olardyń sany 12090-ǵa jetken. Atalǵan qaýyrsyn qanattylardyń bireýi táýligine shamamen 451 gramm balyq tutynady dep eseptesek, oblystyń sý aıdyndarynda olar kúnine jalpy salmaǵy 5,5 tonna balyqty jep qoıady degen sóz. Bul – orasan zor shyǵyn. Byltyr 923 qusty atyp, joıdyq», - deıdi maman.
Mamandardyń sózinshe, jalpy sýquzǵynnyń nájisi de qorshaǵan ortaǵa óte zııan. Jasyl shópke tússe quramyndaǵy qyshqyl ony soldyryp tastaıdy. Bul qustyń óńirdegi popýlıatsııasyn tıimdi basqarý jáne ekojúıedegi tepe-teńdikti qamtamasyz etý úshin jer qoınaýyn paıdalaný basqarmasy onyń sanyn retteý men baqylaýdy qamtıtyn kópjyldyq keshendi jospar ázirlep otyr. Bıyl josparǵa sáıkes 2336 sýquzǵyndy joıý kózdelgen.