Sýıtsıdke oqtalǵan, sabaqtan jıi qalatyn jáne oıynqumar balalardyń derekqory qurylmaq

ASTANA. QazAqparat – Qolaısyz otbasylarda turatyn jáne táýekel tobyndaǵy kámeletke tolmaǵandardyń respýblıkalyq derekqory qurylmaq. Bul týraly Oqý-aǵartý mınıstrligi ázirlegen balalardyń quqyǵyn qorǵaýdyń 2023-2025 jyldarǵa arnalǵan keshendi josparynda jazylǵan, dep habarlaıdy QazAqparat tilshisi.

«Qolaısyz otbasylarda turatyn, sondaı-aq otbasynyń tsıfrlyq kartasy sheńberinde balalarǵa qatysty ómirlik qıyn jaǵdaıdaǵy «táýekel tobyndaǵy» kámeletke tolmaǵandardyń respýblıkalyq derekqoryn qurý jóninde usynystar engiziledi», - delingen qujatta.

Mınıstrlik málimetine saı, myna sanatqa enetin balalardyń respýblıkalyq derekqory qurylmaq:

- buryn zorlyq-zombylyq qylmystary úshin sottalǵan adamdarmen birge turatyndar;

- olardyń densaýlyǵyna, ómirine jáne jynystyq tutastyǵyna qol suǵatyn qylmystardyń qurbandary;

- kámeletke tolmaǵandar saýdasynyń qurbany bolǵan jáne zańsyz urlanǵan nemese elden tys jerlerge kóshirilgen;

- turmystyq zorlyq-zombylyqqa ushyraǵandar, ata-analary nemese olardy almastyratyn adamdar, qamqorshylar jáne basqa týystary tarapynan qatygezdikke ushyraǵandar;

- óz-ózine qol jumsaýǵa áreket jasaǵandar;

- júktiligi bar nemese túsik jasaǵandar;

- quqyq buzýshylyqtar jasaý saldarynan profılaktıkalyq esepte turǵan, sondaı-aq qaıyr suraýmen, qańǵybastyqpen júıeli túrde aınalysatyndar;

- dáleldi sebeptersiz sabaqtan jıi qalatyndar;

- oıynǵa táýeldiligi bar (lýdomanııa) balalar.

Aıta keteıik, balalardy zorlyq-zombylyqtan qorǵaý, sýıtsıdtiń aldyn alý, olardyń quqyǵy men salamattyǵyn qamtamasyz etý jónindegi 2023-2025 jyldarǵa arnalǵan keshendi jospar daıandaldy. Oǵan sáıkes kámeletke tolmaǵandarǵa qatysty jasalǵan zorlyq-zombylyq faktilerin jasyrǵan ata-anany qylmystyq jaýapkershilikke tartý usynysy da engizilgen.