Sýǵa shomylý maýsymy: Abaı oblysynda ózen-kólderde mobıldi toptar kezekshilik etedi
Óńirde aldaǵy jaz aılarynda sý aıdyndarynda halyqtyń qaýipsizdigin qamtamasyz etý maqsatyndaǵy is-sharalar jospary ázirlendi. Qazirgi tańda qala, aýdan ákimdikteri aýmaqtyq TJD bólimshelerimen birlesip, shomylýǵa tyıym salynǵan ýchaskeler men oryndarda eskertý belgilerin ornatyp jatyr.
«Semeı, Aıagóz qalalary men Jarma aýdany Qalbataý aýylynda sý jaǵalaýlaryn qaraýyldaıtyn jáne tótenshe jaǵdaıda shuǵyl áreket etetin 3 jedel qutqarý bólimshesi bar. Turǵyndar shomylý maýsymy kezeńinde qaýipsiz demalýy úshin Semeı qalasynyń Ertis ózeni men Shúlbi sý qoımasynda mobıldi toptardyń kezekshiligi uıymdastyrylady. Alakólde maýsym aıynan bastap oblystyq TJD quramynda 5 adam, 1 tehnıka, 2 qaıyq pen 1 kateri bar qutqarý beketi ashylady», - dep habarlady Abaı oblysy ákimdiginiń baspasóz qyzmetinen.
Sondaı-aq aımaqta balalarǵa júzý daǵdylary tegin úıretiledi. Ol úshin karkasty basseınder satyp alynǵan.
«Shomylý maýsymy kezinde qaýipsizdikti arttyrý jáne oqys oqıǵalardy azaıtý úshin qalalar men aýdandardyń ákimdikterine ruqsat etilmegen shomylý oryndaryna eskertý jáne tyıym salý belgilerin ornatý tapsyryldy. Semeı qalasy men Besqaraǵaı aýdanynyń ákimdigi Ertis ózeni men Shoshqaly kólindegi jaǵajaılardy abattandyrý jumysyn júrgizýi qajet. Sonymen qatar oblys basshysy Nurlan Uranhaev Semeı qalasynyń ákimi Nurbol Nursaǵatovqa qalalyq jaǵajaıdaǵy máselelerdi sheshýdi tapsyrdy. Bul baǵyttaǵy jumystar baqylaýda», - delingen aqparatta.