Sýǵa batyp bara jatqan búldirshinniń qutqarýshysyna tósbelgi tabystaldy

NUR-SULTAN. QazAqparat – Shyǵys Qazaqstanda 6 jasar balany qutqarǵan Ulttyq ulannyń áskerı qyzmetshisi Tilek Qumarbekovke «Sýǵa batqandardy qutqarǵany úshin» medali saltanatty túrde tabystaldy, dep habarlaıdy QazAqparat oblystyq TJD baspasóz qyzmetine silteme jasap.

«Óz ómirin qaterge tigip, shuǵyl jaǵdaıda balaǵa kómekke kelý – naǵyz erlik. Tilek óz ómirin qaterge tikkenin biledi. Ulttyq ulannyń jaýyngerleri árqashan batyldyq tanytýmen erekshelenedi», - dedi ShQO TJD bastyǵynyń orynbasary Arman Toqanov.

Sondaı-aq, ol QR Tótenshe jaǵdaılar mınıstriniń buıryǵymen erjúrek efreıtorǵa «Sýǵa batqandardy qutqarǵany úshin» medalin saltanatty túrde tabys etti.

Oqıǵa 19 shildede bolǵan. Úlbi ózenine batyp bara jatqan balany qutqarýǵa umtylǵan Tilek Qumarbekov sýdyń qatty aǵysyna qarsy turyp, ózi mert bola jazdaıdy. Ol sýǵa tunshyǵyp baryp aman qalǵan.

Osy erligi úshin ol Іshki ister mınıstriniń orynbasary - UU Bas qolbasshysy atynan «Ulttyq ulan qyzmetiniń úzdigi» jáne UU «Shyǵys» óńirlik qolbasshylyǵynyń «Qoǵamdyq tártipti saqtaǵany úshin» tósbelgilerimen marapattalǵan bolatyn.