Sýǵa batqandardyń 70% jýyǵy mas kúıinde shomylǵan – Álıhan Smaıylov

ASTANA. QazAqparat – Úkimet basshysy Álıhan Smaıylov aýyldyq jerlerde sýǵa shomylýda qaýipsizdik máselesine asa mán berilmeıtindigin aıtty, dep habarlaıdy QazAqparat tilshisi.

«Óńir ákimdikteri Tótenshe jaǵdaılar mınıstrligimen birlesip, sýǵa shomylý oryndarymen jáne ondaǵy qaýipsizdikti kúsheıtý jumysyn júrgizýi kerek. Qaýipsizdik sharalary týraly túsindirý jumysyn halyq arasynda belsendi ári keńinen júrgizý qajet. Osy oraıda profılaktıkalyq jumystar negizinen qalalar men aýdandarda ǵana júrgiziledi. Aýyldyq jerlerde buǵan kóńil bólinbeıdi. Sol sebepti de sýǵa batqandardyń basym kópshiligi, ıaǵnı 60-70% aýyl turǵyndary bolyp otyr. Halyqty sýǵa túsý boıynsha qaýipsizdik talaptaryn, alǵashqy kómek kórsetý erejelerin jáne ruqsat etilgen jaǵajaılar týraly úzdiksiz aqparattandyryp otyrý qajet», - dedi Álıhan Smaıylov Úkimet otyrysynda.

Premer-Mınıstr atalǵan jumysty oryndaýda Aqparat jáne qoǵamdyq damý mınıstrliginiń atsalysýy qajettigin aıtty.

«Sýdaǵy qaıǵyly jaǵdaılardyń kóp bóligi ishimdik ishý saldarynan bolatynyn atap ótken jón. Sýǵa batyp qaıtys bolǵandardyń 70% jýyǵy mas kúıinde shomylǵandar. Іshki ister mınıstrligi múddeli memlekettik organdarmen birlesip, osyndaı jaǵdaılardyń aldyn alý úshin tıisti jumystardy uıymdastyrýy qajet», - deıdi Á. Smaıylov.

Buǵan deıin Úkimet basshysy jaǵajaılarda ishimdik ishýge tyıym salýdy usynǵan edi.