Sýǵa batqan qyzdy qutqaryp, ómirin qıǵan aqtóbeliktiń otbasyna páter berildi

<p>Aqtóbe qalasynda jyl úzdikteri anyqtaldy. Bıyl jazda sýǵa batyp bara jatqan qyzdy qutqaryp, kóz jumǵan aqtóbeliktiń otbasyna páter berildi, dep habarlaıdy&nbsp;<a href="https://kaz.inform.kz/" target="_blank" rel="noopener">Kazinform.</a></p>

Qalalyq Mádenıet úıinde «Jyl úzdigi» sharasy ótti. Munda qalanyń áleýmettik-ekonomıkalyq damýyna úles qosyp, qoǵamdyq jumystarǵa belsendi atsalysqan eńbek adamdaryna qurmet kórsetildi.

«2023 jyldy qorytyndylaı otyryp, ár salada aıanbaı qyzmet etip, abyroı bıiginen kóringen azamattarǵa «Jyl úzdigi-2023» nomınatsııasyn tabystadyq. Munda eńbekqor, Otandy súıýdiń, qaıyrymdylyqtyń ozyq úlgisi bolǵan jandar bar», – dedi qala ákimi Azamat Beket.

Jyl úzdigi atanǵandar arasynda sýǵa batyp bara jatqan qyzdy qutqarý kezinde qaza tapqan aqtóbelik Medet Tóleýǵalıevtiń otbasy da boldy. Marqumnyń artynda áıeli men 6 balasy qaldy. Demeýshilerdiń, janashyr jandardyń arqasynda otbasyna eki bólmeli páter berildi.

«Biz úshin erekshe tosynsyı jasaǵan jomart jandarǵa alǵysym sheksiz. Páter kiltin beredi dep oılamadym. Árıne, joldasym erlik jasady. Men de, balalar da ony maqtan tutamyz. Onyń orny tolmaıdy. Odan aıyrylyp qalǵanymyzǵa alty aı boldy. 6 balamen qaldym, kishkentaıym jastan endi asty. Bizge baspana syılaǵan jandarǵa alǵys aıtamyz, – dedi Aıgerim Tóleýǵalıeva.

Eske salsaq, bıyl Aqtóbe qalasyndaǵy Elek ózeninde 39 jastaǵy aqtóbelik sýǵa batyp bara jatqan qyzdy qutqaryp, ózi ajal qushty.

Aqtóbe qalasy ákiminiń baspasóz qyzmetiniń habarlaýynsha, “Jyl úzdigi -2023” nomınanttarynyń qatarynda 8000 muqtaj otbasyn azyq-túlikpen qamtamasyz etken “Ybyraı” qorynyń basshysy, metsenat Áset Óteǵalıev te boldy. Ol “Mektepke jol” aktsııasy aıasynda áleýmettik osal toptaǵy 2500 oqýshyny kıindirdi, pandemııa kezinde qalalyq aýrýhanalarǵa ókpeni jasandy tynystandyrýǵa arnalǵan 100 apparat alyp berdi. Sondaı-aq sońǵy 3 jylda muqtaj otbasylarǵa 90 tonna kómir taratty.