Sýdıalar derbestiginde jańa reformalar erekshe áser etti — Joǵarǵy sot tóraǵasy
«Sýdıalardyń naqty táýelsizdigin qamtamasyz etýde Joǵary sot keńesiniń reformalary erekshe ról atqardy. Memleket basshysynyń kelisimi boıynsha Joǵary sot keńesi úzdik halyqaralyq standarttarǵa jaýap beretin jáne sot bıliginiń barlyq deńgeılerin bildiretin tolyqqandy sýdıalyq ózin-ózi basqarý organyna aınaldy. 2019 jyldan bastap kezeń-kezeńimen sot júıesiniń barlyq kadr máseleleri, sonyń ishinde Sot tóreligi akademııasy men Sot jıýrıi Joǵary sot keńesiniń qaramaǵyna aýystyryldy. Osylaısha, qazir Joǵary sot keńesi sot kadrlaryna, olardyń biliktiligine, odan ári mansaptyq ósýine jáne qurmetti otstavkaǵa shyǵýyna tolyq jaýap beredi. Bul rette barlyq deńgeıdegi tóraǵalar sýdıalardyń kadrlyq máseleleri men mansabyna yqpal etý múmkindiginen aıyryldy», - dedi A. Merǵalıev.
Sonymen qatar ol sýdıalardyń jaýapkershiligin arttyrý maqsatynda tártiptik is júrgizýdi qozǵaýdyń jańa tetigi ázirlengenin aıtty.
«Endi Joǵary sot keńesi janyndaǵy Sot jıýrıi sýdıanyń zańdylyqty óreskel buzǵany týraly kórsetilgen árbir kúshin joıǵan sot aktisin tekseretin bolady. Konstıtýtsııalyq sottyń usynysy boıynsha zańdy óreskel buzý ólshemsharttaryn zańnamalyq bekitý máselesi pysyqtaldy», - dedi Joǵarǵy sot tóraǵasy.
Onyń aıtýynsha, Joǵarǵy sot janyndaǵy Sot tóreliginiń sapasy jónindegi komıssııanyń jumysy jetildirildi.
«Apellıatsııalyq satynyń róli kúsheıtildi. Byltyr shildeden bastap apellıatsııalyq sottar isterdi qaıtarýdy toqtatty», — dedi Aslambek Merǵalıev.