Sýdy tym kóp qajet etetin egis alqaptaryn azaıtý kerek – Prezıdent

ASTANA. QazAqparat – Prezıdent Qasym-Jomart Toqaev Parlament palatalarynyń birlesken otyrysynda sý únemdeý boıynsha birqatar bastama kóterdi, dep habarlaıdy QazAqparat tilshisi.

«Egin sharýashylyǵynda mańyzdy reforma jasaıtyn kez keldi. Egis túrlerin kóbeıtýimiz kerek. Sondaı-aq kóbirek paıda ákeletin daqyldar ekken jón. Sýdy kóp qajet etetin egis alqabyn birtindep azaıtyp, bir ǵana daqyl túrin egýdi shekteý qajet. Dıqandardy jergilikti tuqymmen qamtamasyz etý mańyzdy. Sonymen qatar jańa suryptardy shyǵaryp, ony ósirý máselesin sheshken jón», - dedi Memleket basshysy.

Prezıdent elimiz úshin sýdyń mańyzy munaı, gaz nemese metaldan kem emes ekenin, sondyqtan Sý resýrstary jáne ırrıgatsııa mınıstrligi qurylatynyn aıtty.

Buǵan deıin Prezıdent aldaǵy úsh jylda agroónerkásiptegi óńdelgen ónim úlesin 70% jetkizý kerektigin aıtqan edi.

Sondaı-aq, eldegi aýyl sharýashylyǵy tehnıkasynyń 80 paıyzy tozyp tur, jyl saıyn onyń 8-10 paıyzyn jańartyp otyrý qajet.