Sýdy esepke alýdy tsıfrlandyrýdy qamtamasyz etý qajet – Asqar Mamın
«Ákimder gıdrotehnıkalyq qurylystardy rekonstrýktsııalaý jumystaryn qamtamasyz etýi tıis. Magıstraldyq arnalarǵa qazirgi zamanǵy sý únemdeý tehnologııalaryn engizýdi jáne sýdy esepke alýdy tsıfrlandyrýdy qamtamasyz etý qajet.
Túrkistan oblysynda iske asyrylǵan magıstraldyq arnany tsıfrlandyrý boıynsha qanatqaqty jobany sý sharýashylyǵynyń barlyq negizgi nysandaryna taratý kerek», - dedi Úkimet basshysy.
Onyń aıtýynsha, sýmen qamtamasyz etilýdiń tómendep bara jatqanyn eskerip, sý alýdyń qoldanystaǵy lımıti aıasynda sý resýrstaryn utymdy paıdalanýdy qamtamasyz etý kerek.
«Sonymen qatar, Qyzylorda, Almaty jáne Túrkistan oblystarynda ylǵaldy kóp qajet etetin daqyl – kúrish, jospardan artyq egilgen. Buǵan jumsalǵan eleýli sý kólemin ekonomıkalyq turǵydan tıimdirek daqyldardy – kókónister, jemis-jıdekter, raps, soıa ósirýge jumsaýǵa bolar edi. Sondyqtan ákimdikter bekitilgen egis josparyn qatań ustanýy tıis», - dedi Premer-Mınıstr.
Osyǵan oraı A. Mamın birqatar tapsyrmalardy júktedi.
«Aýyl sharýashylyǵy, Ekologııa, Saýda mınıstrlikteri ishki qajettilikter men egis alańynyń qurylymyn ártaraptandyrý boıynsha mindetterdi eskere otyryp, ylǵaldy kóp qajet etetin daqyldar egisin aýystyrý máselesin ákimdermen pysyqtasyn. Bul agroónerkásiptik keshendi damytýdyń jańa baǵdarlamasyna engizilýi kerek», - dedi ol.
Úkimet basshysynyń sózine qaraǵanda, Dúnıejúzilik banktiń boljamyna sáıkes aldaǵy 20-30 jylda Ortalyq Azııa elderinde sý tapshylyǵy ósedi. Sondyqtan sý resýrstaryn barlyq memleketterdiń múddelerin eskerip, tıimdi paıdalaný máselesiniń mańyzy artyp otyr.
«Osyǵan oraı Ekologııa mınıstrligine múddeli memlekettik organdarmen birlesip, kórshi memleketterdiń salalyq vedomstvolarymen shekaraaralyq ózenderdi ózara tıimdi paıdalanýdy qamtamasyz etý boıynsha jumysty kúsheıtýdi tapsyramyn», - dedi Premer-Mınıstr.
«Ekologııa jáne Aýyl sharýashylyǵy mınıstrlikteri ákimdiktermen birge sý sharýashylyǵy nysandaryn salý jáne rekonstrýktsııalaý, sonymen qatar sý únemdeý tehnologııalary men sýdy esepke alýdyń tsıfrlyq júıelerin engizý boıynsha jobalardy iske asyrý boıynsha jumysty jalǵastyrsyn», - dedi Asqar Mamın.
Budan buryn habarlanǵandaı, Úkimet basshysy Sý resýrstaryn basqarýdyń memlekettik baǵdarlamasynyń jobasy ázirlengendigin málim etken bolatyn.
Aıta keteıik , búgin Úkimet otyrysynda Ekologııa, geologııa jáne tabıǵı resýrstar mınıstri Maǵzum Myrzaǵalıev aıtty elimizde sý únemdeýshi tehnologııalardy engizý qandaı nátıje beretinin aıtty.