Sýdyń «qara naryǵy»: Jambylda tirshilik kózin saýdaǵa salǵandarmen Bas prokýratýra aınalysady

<p>ASTANA. KAZINFORM — Sý resýrstary jáne ırrıgatsııa mınıstrligi Jambyl oblysynyń sý sharýashylyǵy salasyna júrgizgen aýdıt materıaldaryn Bas prokýratýraǵa joldady.</p>

Osyǵan deıin sýdyń «qara naryǵymen» kúresý jáne ashyqtyqty qamtamasyz etý maqsatynda mınıstrliktiń ishki aýdıt departamenti Jambyl oblysy boıynsha «Qazsýshar» fılıalyna tekseris júrgizgen bolatyn.

Nátıjesinde fılıal dırektory men Shý-Talas basseın ınspektsııasynyń basshysy tártiptik jaýapkershilikke tartyldy. 

Anyqtalǵan zańbuzýshylyqtardy odan ári qaraý úshin aýdıt materıaldary QR Bas prokýratýrasyna jiberildi. 

Esterińizge sala keteıik, mınıstrlik mamandary Jambyl oblysynda júrgizgen aýdıt barysynda sý resýrstaryn zańsyz paıdalanýdyń 10-ǵa jýyq faktisin, sondaı-aq sharýalarmen sýarmaly sý berý kelisimshartyn jasaý barysynda zańbuzýshylyqtarǵa jol bergenin anyqtaǵan bolatyn.

«Sýdyń „qara naryǵymen“, ıaǵnı sý resýrstaryn zańsyz paıdalaný faktilerimen kúres jalǵasady. Zańdy buzǵan barlyq quqyq buzýshylar men basshylyq laýazymdaǵy qyzmetkerler jaýapqa tartylady. Biz sý resýrstaryn paıdalanýdy baqylaýdy kúsheıtemiz. Ol úshin qoldanystaǵy zańnamaǵa ózgeris engizý usynylyp otyr», — dedi Sý resýrstary jáne ırrıgatsııa mınıstri Nurjan Nurjigitov.

Osyǵan deıin Joǵary aýdıtorlyq palata tekserisiniń qorytyndysy boıynsha «Qazsýshar» mekemesiniń basshylyq laýazymdaǵy 5 qyzmetkeri jaýapqa tartylǵan bolatyn.