Sýdanda qalǵan Qazaqstan azamattarynyń kóbisi taý-ken salasynda jumys istep júr

ASTANA. QazAqparat – Syrtqy ister mınıstrliginiń resmı ókili Aıbek Smadııarov Sýdannan qaýipsiz jerge jetkizilgen Qazaqstan azamattary týraly aıtty, dep habarlaıdy QazAqparat tilshisi.

«Sýdandaǵy qaqtyǵystyń kúsheıýine baılanysty Qazaqstannyń Mysyr men Efıopııadaǵy elshilikteri jáne Djıdda qalasyndaǵy bas konsýldyǵy Qazaqstan azamattaryn atalǵan elden evakýatsııalaý máselesin pysyqtady. Bastapqyda Sýdandaǵy Qazaqstannyń úsh azamaty týraly belgili bolǵan edi. Bul týraly osyǵan deıin aıttyq. Jaqynda BAQ-ta aqparat shyqqannan keıin, mınıstrlikke taǵy 14 azamatymyz habarlasty. Qolda bar aqparatqa sáıkes, janjal shıeleniskenge deıin Sýdan aýmaǵynda Qazaqstannyń 17 azamaty bar ekeni belgili boldy. Olardyń basym bóligi jergilikti taý-ken kompanııasynda jumys istep jatyr. Biraz bóligi sondaǵy halyqaralyq uıymdarda qyzmette júr», - dedi A. Smadııarov elordada ótken baspasóz máslıhatynda.

Onyń aıtýynsha, qazirgi kezde shetelderdiń elshilikterimen birlesip, Qazaqstannyń 6 azamaty jaqyn mańdaǵy elder arqyly qaýipsiz jerge kóshirildi. BUU júıesindegi ıÝNISEF-te qyzmet etetin Qazaqstannyń bir azamaty Iordanııadaǵy ıÝNISEF kampýsyna ornalasty. Al bir otandasymyz óz qalaýy boıynsha Birikken Arab Ámirlikterinde qaldy. Qalǵan tórt Qazaqstan azamaty elimizge keldi.

«Endi qalǵan 11 azamatqa toqtalsaq, olar ózderiniń qalaýymen Sýdanda qalatynyn aıtty. Olardyń 10-y taý-ken kompanııasynda jumys istep jatyr. Al taǵy bir azamat dáriger retinde uıym quramynda jergilikti halyqqa kómektesýge qaldy. Sonymen qatar, qazaqstandyqtar jumys isteıtin kompanııa basshysymen de habarlastyq. Ol basshynyń aıtýynsha, eger jaǵdaı qıyndasa, onda bizdiń azamattar sol kompanııa qyzmetkerlerimen birge elden shyǵarylady», - dedi resmı ókil.

Budan buryn habarlanǵandaı, jaqynda Qazaqstannyń birqatar azamaty Sýdandaǵy qaqtyǵys aımaǵynan evakýatsııalandy.

Bıyl sáýir aıynda Sýdanda kúsh qurylymdary arasynda qarýly qaqtyǵys bastaldy.