Sýda qalǵan turǵyndardy qaıyqpen tasymaldadyq – polıtseı
Janbolat Jastilekulynyń aıtýynsha, Qorjyn aýylynan adamdardy kóshirýge kómektesý úshin 28 naýryz kúni tikushaqpen barǵan.
«Qorjynǵa anyqtaýshy, polıtsııa kapıtany Ádilbek Idırov, azamattyq qarýǵa ruqsat berý tobynyń ınspektory, polıtsııa leıtenanty Qaziret Keńesovpen birge bardyq. Qorjyn aýylyndaǵy ýchaskelik polıtsııa ınspektory, polıtsııa maıory Erbolat Qadyr sý tasqyny bastalǵannan beri sonyń basy-qasynda júr. Biz rezeńke etik kıip, tótenshe jaǵdaı, jergilikti atqarýshy organ qyzmetkerlerimen birlese qımyldap, áıelderdi, aýrý-syrqaý adamdardy, balalardy eki tikushaqqa deıin qaıyqpen jetkizip otyrdyq. Qazir Qorjynda negizinen er adamdar qaldy. Menen basqa atalǵan polıtsııa qyzmetkerleri de sonda qalyp, qoǵamdyq tártipti qadaǵalap, turǵyndardyń mal-múlkin saqtaýǵa úles qosýda. El basyna qıyn sát týǵanda biz de birgemiz ǵoı»,-deıdi J.Mýrzashev.
BQO polıtsııa departamentiniń málimeti boıynsha sý tasqynynan zardap shekken aýdandarda tártip saqshylary evakýatsııa júrgizilgen eldi mekenderde azamattardyń múlkin qorǵaý úshin táýliktik kezekshilik ornatyp, qaýipsizdikti qamtamasyz etý jumystaryn júrgizýde.
Oǵan qosa Qaratóbe jáne Shyńǵyrlaý aýdandarynyń polıtsııa qyzmetkerleri qaıyrymdylyq kómek kórsetýde, ıaǵnı úıi sýǵa ketip, shyǵynǵa qalǵan otbasylardy azyq-túlikpen, qajetti kerek-jaraqtarymen qamtamasyz etip jatyr.
«Jergilikti ákimdikter, polıtsııa jáne tótenshe jaǵdaılar organdary sý basqan nysandardy soryp alý jáne adamdardy qutqarý boıynsha jan-jaqty shara qoldanýda. Kúni búgin oblys boıynsha 19 joldy sý basty, sonyń úsheýi – oblystyq, 16-sy – aýdandyq mańyzy bar joldar. Sol jerlerde jol qaýipsizdigin qamtamasyz etý úshin BQO PD patrýldik polıtsııa batalonynyń qyzmetkerlerimen statsıonarlyq beketter ornatyldy. Jalpy sý tasqynynan qorǵaý jumystaryna 88 polıtsııa qyzmetkeri men 40 qyzmettik tehnıka jumyldyryldy», dep habarlady vedomstvodan.
BQO TJ departamentiniń baspasóz qyzmetinen túsken málimetke qaraǵanda, oblys boıynsha sý kirgen úıler sany 460-qa jetti.
Sý tasqynyna qarsy jumystarǵa tótenshe jaǵdaılar departamenti, jergilikti atqarýshy organdar, QR TJM № 28327 áskerı bólimi, QR Qorǵanys mınıstrligi, Ulttyq ulan jáne QR Іshki ister mınıstrliginen 931 adam (297 tehnıka, 96 motopompa) qatysýda.
25 naýryzdan beri 529 myń tekshe metr sý sorylyp, ınertti materıaldarmen 53 930 qap tóseldi.
Batys Qazaqstanǵa kómekke kelgen Mańǵystaý oblysy TJD órt sóndirýshi-qutqarýshylary qazirgi ýaqytta Bórli aýdanyndaǵy sý tasqyny zardaptaryn joıýǵa tolyq jumyldyrylǵan.
Sol sekildi buǵan deıin Syrym aýdanynda bolǵan QR TJM № 28327 áskerı bóliminen 50 adam kúni búgin Oral qalasyna kelip, qaptardy ınertti materıalmen toltyryp, tóseýge tartyldy.
Shyńǵyrlaý ózeniniń arnasynan asýyna baılanysty Bórli aýdany Aqsý jáne Keńtúbek aýyldarynda 251 adam evakýatsııalandy.
BQO TJ departamenti Aqsý aýylynda qutqarýshynyń muz ústinde qalǵan ıtti qutqarǵan beınejazbasyn jarııalady.
Bul Aqsaı qalasynda jańadan ashylǵan № 29 órt sóndirý bólimshesiniń qyzmetkeri, azamattyq qorǵaý kishi serjanty Beksultan Óteǵalıev bolyp shyqty.
Sonymen qatar búgin túsirilgen taǵy bir beınejazbada qutqarýshynyń sýǵa ketken úıdiń aýlasynan ıtti alyp shyǵyp kele jatqany kórsetilgen.
Eske sala keteıik, budan buryn Batys Qazaqstanda taǵy bir aýyl turǵyndaryn evakýatsııalaý júrgizilip jatqanyn jazǵan bolatynbyz.
Sondaı-aq BQO-da muzdaı sý keshken qutqarýshy qashanda elmen birge ekenin aıtty.