Sýdıalarǵa qarsy arnaýly is-sharalar Bas prokýrordyń sanktsııasymen ǵana júrgizilmek

ASTANA. QazAqparat – Sýdıalarǵa qarsy arnaýly is-sharalardy Bas prokýrordyń sanktsııasymen ǵana júrgizý usynylady. Bul týraly senator Andreı Lýkın aıtty, dep habarlaıdy QazAqparat tilshisi.

«Búginde quqyq qorǵaý organdarynda sýdıalarǵa yqpal etýdiń ózindik quraldary bar. Olar qylmystyq issiz kez kelgen sýdıaǵa qarsy arnaýly jedel izdestirý is-sharasyn júrgizýge quqyly. Tek oblys prokýrorynyń sanktsııasyn alsa jetkilikti. Sol sátten bastap kúshtik organ sýdıany tyńdaı alady, ol týraly jáne jeke ómiri jaıly málimetter jınaı alady. Sondyqtan sýdıalarda olardan qorqýǵa negiz bar», - dedi Andreı Lýkın Senattyń jalpy otyrysynda «QR-nyń sot júıesi jáne sottardyń mártebesi týraly» zań jobasyn tanystyra kele.

Onyń atap ótýinshe, zań jobasyn Senatta talqylaý nátıjesinde sýdıalarǵa qatysty arnaýly jedel izdestirý is-sharasyn tek Bas prokýratýra ǵana santsııalaıdy dep aıqyndalǵan.

«Sondyqtanda bul kepildi Konstıtýtsııalyq zań deńgeıinde bekitý usynylyp otyr. Bul sýdıalardyń táýelsizdigin nyǵaıtady», - dedi senator.