Sýdıalardyń júktemesi birshama kemidi - Túrkistan oblysy
Jıyndy oblystyq sottyń tóraǵasy Talǵan Baratbekov ashyp, 2019 jyldyń sot júıesi úshin kóptegen jaǵymdy ózgeristermen erekshelengenin atap ótti. Sonymen qatar, tóraǵa Joǵarǵy sot tóraǵasy Jaqyp Asanovtyń 2020 jyldy kommýnıkatsııa jyly dep jarııalaǵanyn eske salyp, bıyl da sot tóreligin atqarý boıynsha nátıjeli jumys atqarylatynyna senim bildirdi.
Jıynda sondaı-aq, azamattyq, ákimshilik jáne qylmystyq ister boıynsha sot tóreligin júzege asyrýdyń qorytyndylary týraly Azamattyq ister jónindegi sot alqasynyń tóraǵasy Túgel Bekimbetov pen Qylmystyq ister jónindegi alqa tóraǵasynyń mindetin atqarýshy Taýbaı Qadyrbaevtyń baıandamalary tyńdaldy. Alqa tóraǵalary sot tóreligi men pılottyq jobalardy iske asyrý boıynsha esepti kezeńde jetken jetistikter men jiberilgen kemshilikter týraly statıstıkalyq málimetter keltire otyryp, birqatar aýdandyq sottardyń jumystaryna qatysty syn pikirlerin bildirdi. Sýdıalardyń is-áreketine aryz-shaǵymdardy qaraý tobynyń jumysy jóninde oblystyq sottyń sýdıasy Klara Jappasova baıandady. Ol óz sózinde «Sapaly nátıje» jobasynda kózdelgen maqsattarynyń biri - shaǵymdardyń sanyn azaıtý bolyp tabylatynyn jáne bul kórsetkish sottarǵa túsken shaǵymdardyń sanymen ólshenetinin aıtty.
Oblystyq sottyń tóraǵasy Talǵat Baratbekov keńeıtilgen keńestiń jumysyn qorytyndylaı kele, jyldan-jylǵa sýdıalardyń júktemesi kemip otyrǵanyna nazar aýdardy. Olardyń sapaly jumys jasaýyna, isterdi merziminde qaraýyna, tatýlasý rásimderin keńinen qoldanýǵa, sondaı-aq sot aktilerin zańǵa sáıkes jáne túsinikti jazýǵa, taraptarǵa túsindirýge tolyq múmkindikteri bar ekenin atap ótti. Sonymen qatar, Talǵat Baratbekov aýdandyq sottardyń tóraǵalaryna jumysta jiberilgen kemshilikterdi joıý úshin tıisti sharalardy qoldanýdy tapsyrdy. «Sot tóreliginiń jeti túıini» baǵdarlamasynda kózdelgen tapsyrmalardy odan ári iske asyrý, sybaılas jemqorlyqqa jol bermeý baǵytynda atqarylýy tıis jumystardy naqtylady.