Sýdıalardy ǵana emes, prokýrorlardy da tárbıeleý kerek - Bas prokýrordyń orynbasary
«Bárimizdi de tárbıeleý kerek, sol sebepti reforma júrip jatyr. Memleket basshysy álemniń ózgergenin, eldiń ózgergenin, naryqtyq qatynastar men ekonomıkanyń ózgergenin birneshe ret aıtty. Al quqyq qorǵaý organdary ilgeri basar emes. Bizge ózgerý qajet, jumys stıli men oılaýdy ózgertý qajet. Bul jalǵyz sýdıalarǵa ǵana emes, prokýrorlarǵa da, tutas quqyq qorǵaý blogyna qatysty sóz. Bul úlken eskertý. Búgin biz zań ústemdigin arttyryp, álemdik standarttarǵa jaqyndaý úshin jumys istep jatyrmyz», - dedi M.Ahmetjanov jýrnalıster suraǵyna jaýap bere otyryp.
Buǵan deıin Memleket basshysy Nursultan Nazarbaev «Habar» telearnasyna bergen suhbatynda Qazaqstandaǵy ádilettilik salasyndaǵy reformalardyń yqpaly qandaı bolatynyn aıtyp, sýdıalardy tárbıeleý qajettigin málimdegen edi.
«Sýdıalardy tárbıeleý kerek. Olar áli keńestik kezeńde júr. Qazir Germanııa, Ulybrıtanııa, Frantsııa jáne tabystarǵa qol jetkizgen postkeńestik memleketterdiń tájirıbesin zerttep jatyrmyz. Solarǵa qarap, ózimizge qajetti úzdik tájirıbeni tańdaımyz», - dep óz sózin túıindegen edi Elbasy.