Sýdıalar ınvestıtsııalyq daýlardyń negizgi problemasyn jarııa etti
«Sýdıalar úshin qıyndyq týǵyzǵan negizgi máselelerdiń biri - Kásipkerlik kodekstiń birqatar normalarynyń jetik bolmaýy. Atap aıtqanda, «ınvestıtsııalar», «ınvestıtsııalyq qyzmet» pen «ınvestordyń» naqty anyqtamasy joq. Sosyn ınvestıtsııalyq daýlar men ınvestıtsııalyq qyzmetke qatysty basqa da daýlardyń arajigi ashyq kórsetilmegen. Sonyń saldarynan ınvestorlar naqty qaı sotqa júginetinin bilmeıdi», - dedi Ermaǵambetova ınvestıtsııalyq daýlardy qaraý máselelerine arnalǵan búgingi jıynda. Onyń aıtýynsha, qoldanystaǵy Kásipkerlik kodekste «kásipkerlik qyzmetti júrgizý maqsatynda jarǵylyq kapıtalǵa aqsha quıǵan, ıa bolmasa, zańdy tulǵanyń aktıvterin kóbeıtken kez kelgen adam ınvestor bola alady» degen anyqtama berilgen. «Alaıda bizdiń tájirıbemizge sáıkes, sotqa ol adamdar júginip jatqan joq. Investıtsııalyq daýlar boıynsha kóp jaǵdaıda sheteldik qarjysy bar zańdy tulǵalar nemese sheteldik kompanııalardyń Qazaqstandaǵy fılıaldary aryz-shaǵym túsirip jatady. Osyǵan baılanysty biz «ınvestor» men «ınvestıtsııalyq qyzmettiń» naqty anyqtamasyn berýdi usynyp otyrmyz. Birinshiden, ınvestordy «óz aktıvterin Qazaqstanda ornalastyrý arqyly óz qyzmetin fılıal arqyly júrgizetin zańdy tulǵa» dep kórsetý kerek. Mysaly, oǵan óz fılıaldary arqyly jumys isteıtin iri munaı-gaz kompanııalaryn jatqyzýǵa bolady. Ekinshiden, sheteldik ınvestordyń qatysýymen qurylǵan jeke nemese zańdy tulǵany ınvestor retinde belgileý kerek. Úshinshiden, memlekettik organdarmen kelisimshart negizinde jumys isteıtin Qazaqstannyń jeke jáne zańdy tulǵalaryn ınvestor retinde qorǵaýǵa bolady», - dep atap kórsetti sýdıa.
Jalpy, ótken jyly Joǵarǵy Sottyń qaraýyna ınvestıtsııalyq daýlarǵa qatysty 22 aryz túsken bolatyn. Sonyń basym bóligi - munaı-gaz salasyndaǵy jumys isteıtin iri ınvestorlar. Olar kóp jaǵdaıda memlekettik organdardyń tarapynan jiberilgen salyq máselelerin daýlaıdy.
Aıta keteıik, Qazaqstanda ınvestıtsııalyq daýlar boıynsha sot óndirisin qolǵa alýdyń negizgi maqsaty - ınvestorlardyń quqyqtaryn qorǵaý, olardyń otandyq sot júıesine degen senimin arttyrý. Oǵan qosa, aldaǵy ýaqytta qazirgi EKSPO kórmesiniń aımaǵynda «Astana» xalyqaralyq qarjy ortalyǵyn qurý josparlanyp otyr. Osy bastamanyń arqasynda sheteldik qarjyny el ekonomıkasyna kóptep tartýǵa múmkindik bar. Alaıda kez kelgen ınvestor óz aqshasyn ózge memlekettiń ekonomıkasyna quıardyń aldynda ol eldiń ekonomıkalyq turaqtylyǵyna, sondaı-aq ınvestıtsııalyq daýlardyń ádil sheshý tájirıbesine basa nazar aýdarady.