Sýdıa laýazymyna kandıdattar psıhologııalyq testileýden ótetin bolady

ASTANA. QazAqparat - Búgin Parlament Májilisiniń jalpy otyrysynda «Qazaqstan Respýblıkasynyń sot júıesi men sýdıalarynyń mártebesi týraly» Qazaqstan Respýblıkasynyń Konstıtýtsııalyq zańyna ózgerister men tolyqtyrýlar engizý týraly» zań jobasyn maquldady. Atalǵan zań jobasy Elbasynyń «100 naqty qadam» Ult josparynyń 17-shi qadamyn oryndaý maqsatynda ázirlengen.

Zań jobasy sýdıa laýazymyna kandıdattardy irikteý mehanızmi barysyndaǵy biliktilik talaptary ózgertiledi. «Ózgeristerdiń birqatary «Qazaqstan Respýblıkasynyń Joǵarǵy Sot Keńesi týraly» jańa redaktsııadaǵy zań jobasyn ázirleýge baılanysty týyndady. Bul rette sýdıa kandıdattaryna qoıylatyn talaptar arasynda sot otyrystarynyń hatshysy, sýdıanyń, prokýrordyń, advokattyń kómekshisi qyzmetindegi jumys ótilderiniń bolýy talap etiledi. Sot óndirisimen tikeleı baılanysty qyzmetterde ótili bar tulǵalar sýdıa laýazymyna aıtarlyqtaı daıyndyqtan ótken dep sanalady», - dedi zań jobasy boıynsha QR Joǵarǵy Sotynyń sýdıasy Aqyltaı Qasymov.

Onyń aıtýynsha, zań jobasymen psıhologııalyq testileýden ótkizý qajettiligi qamtylyp otyr. Sonymen qatar, Memleket basshysynyń tapsyrmasyn júzege asyrý maqsatynda sýdıa laýazymyna taǵaıyndalǵan tulǵanyń bir jyldyq synaq engiziledi. Ol merzim aıaqtalǵannan soń sýdıa qyzmeti mindetti baǵalaýǵa jatady. Bundaı baǵalaý keıinnen árbir bes jyl saıyn júrgiziletin bolady, tek 20 jyldyq ótili bar sýdıalar ǵana bundaı baǵalaýǵa jatpaıdy. Tutastaı alǵanda, aýdandyq, oblystyq sottardyń jáne Joǵary Sot sýdıalary laýazymyna kandıdattar úshin sýdıalyq jumysta belgili bir eńbek ótiliniń mindetti túrde bolýy belgilenip otyr. Sondaı-aq, otstavkaǵa negiz bolatyn sýdıalyq jumys ótili 20 jylǵa belgilenip otyr.

«Zań jobasynyń jańalyqtary ýaqytyly ári sapaly sot tóreligin qamtamsyz etip, sot bıliginiń táýelsizdigin odan ári qamtamasyz etýge múmkindik beredi», - dedi Joǵarǵy Sot sýdıasy Aqyltaı Qasymov.

Májilis maquldaǵan zań jobasy Senatqa joldanady.