Sýdıa qyzmetine kásibı zańgerlerdi tartamyz - Jaqyp Asanov
"Jaqynda Memleket basshysy sot júıesiniń birqatar problemalaryn atady. Sonyń barlyǵy jaqyn arada sheshiletin bolady. Menińshe, kelesi jyldyń alty aıynda naqty nátıjeler kórine bastaıdy. Birinshiden, sýdıa qyzmetin úzdik zańgerler atqarýy qajet. Olardyń arqasynda adam quqyqtaryn barynsha qorǵap, kúrdeli isterdi sheshýge bolady. Al ondaı ister kóp. Sonyń ishinde zııatkerlik quqyq, tabıǵı monopolııalardy retteý, qarjy, keden jáne bank daýlary bar", - dedi J.Asanov BUU Adam quqyqtarynyń jalpyǵa birdeı deklaratsııasyna arnalǵan jıynda.
Bas sýdıanyń aıtýynsha, búginde myqty qazaqstandyq zańgerler sýdıa bolǵysy kelmeıdi. Sebebi aýyr júktemeniń bar ekenin biledi. Oǵan qosa, áleýmettik jeńildikter az.
"Osyǵan baılanysty biz konstıtýtsııalyq zań arqyly myqty zańger-ǵalym retinde qalyptasqan, shetelde bilim alǵan, quqyq salasyn jaqsy biletin kásibı mamandarǵa oblystyq, tipti Joǵarǵy sotqa jol ashatyn bolamyz. Halyqqa sapaly sot úkimi kerek. Bul - árbir sýdıanyń negizgi ónimi. Sot úkimi sapaly bolsa, xalyqtyń senimi de bolady. Sot sheshimi qarapaıym ári túsinikti tilde jazylýy shart. Al, eń bastysy, onda kórsetilgen barlyq dálelder naqty jáne anyq kórsetilýi kerek. Aryz berýshi ony oqyǵannan keıin ary qaraı sottaspasa, sot úkimine senim bildirgeni. Mine, osyny "ádiletti ári sapaly sot" dep ataýǵa bolady. Bizge dál osyndaı formatqa aýysý qajet. Bul - Prezıdenttiń tapsyrmasy", - dep atap kórsetti J.Asanov.