Sý basqan óńirlerden 11 myń adam kóshirildi: Úkimet tótenshe jaǵdaımen qalaı kúresip jatyr

<p>ASTANA. KAZINFORM — Oljas Bektenov Sý tasqynyna qarsy is-sharalardy úılestirý jáne sý tasqyny kezeńiniń zardaptaryn joıý jónindegi respýblıkalyq shtabtyń otyrysyn ótkizdi. </p>

Shtabtyń negizgi mindeti — sý tasqynyna qarsy is-sharalardy júrgizý jáne azamattardyń qaýipsizdigin qamtamasyz etý jónindegi qyzmetti úılestirý. 

Shtab basshysy — Premer-Mınıstr Oljas Bektenov, Premer-Mınıstrdiń orynbasary Qanat Bozymbaev shtab basshysynyń orynbasary bolyp taǵaıyndaldy.

Foto: QR Úkimeti

Shtab quramyna Prezıdent Ákimshiliginiń basshylyǵy, ortalyq jáne jergilikti atqarýshy organdardyń basshylary kirdi.

Otyrysta Memleket basshysynyń tapsyrmalarynyń oryndalý barysy jáne sý tasqynyna qarsy is-sharalardy kúsheıtý sharalary týraly mınıstrler men óńirlerdiń ákimderi tyńdaldy.

TJ aımaqtarynan barlyǵy 11 306 adam evakýatsııalandy. Ýaqytsha ornalastyrý beketterinde 5 456 adam bar.

Sý shaıyp ketken 40 avtojoldy, kópirdi jáne 39 jol tósemin qalpyna keltirý jumystary baqylaýǵa alyndy. 

Kólik qatynasy toqtap qalǵan eldi mekendermen baılanys ornatylyp, ákimdikter azyq-túlik pen dári-dármektiń qajetti qoryn daıyndady.

TJ aımaqtaryndaǵy halyqqa kómek kórsetý táýlik boıy, onyń ishinde áýe kemeleriniń kómegimen júzege asyrylýda.

Jumysqa 7 myńnan astam adam, 2 myńnan astam tehnıka, onyń ishinde sý aıdaý quraldary, júzý jáne áýe kemeleri tartyldy.

Foto: QR Úkimeti

Sý qoımalary men ózenderdegi jaǵdaıǵa monıtorıng júrgizilýde.

Qazirgi ýaqytta Aqtóbe, Sazdy, Aşysý, Jartas sý qoımalary tranzıttik rejımde jumys istep tur, belsendi túrde sý jiberý júzege asyrylýda.

Qarǵaly sý qoımasy jınaqtaý rejıminde. Ákimdikter sý tasqynynyń qaýpi joǵary óńirlerde aldyn alý sharalaryn júrgizip jatyr.

Qajet bolǵan jaǵdaıda qosymsha kúshter men quraldar jiberiledi.

TJ saldarynan qıraǵan úılerdi qalpyna keltirý jumystary men salýǵa QR Úkimeti men jergilikti atqarýshy organdardyń rezervinen qarajat bólinedi. 

Úıi apatty dep tanylǵan zardap shekken azamattardyń tizimin jergilikti ákimdikter jasaıdy.

«Memleket basshysy sý tasqynyna qarsy is-sharalardy qanaǵattanarlyqsyz dep synǵa aldy. Qazirden bastap apattan kelgen zalaldyń kólemin baǵalaýdy bastap, zardap shekken adamdarǵa dereý materıaldyq kómek kórsetýge kirisý kerek. Sondaı-aq bolashaqta mundaı aýqymdy sý tasqynynyń aldyn alý úshin keshendi sharalar ázirleý qajet. Ár óńirde naqty is-qımyl jospary bolýǵa tıis», — dep atap ótti shtab tóraǵasy Oljas Bektenov.

Foto: QR Úkimeti