Sý astynda qalǵan 4 myńnan astam úı apatty dep tanyldy

<p>ASTANA. KAZINFORM — QR Premer-Mınıstrdiń orynbasary Qanat Bozymbaev sý basqan óńirlerdi qalpyna keltirý jumystary boıynsha Úkimet otyrysynda esep berdi.</p>

«Jekelegen óńirlerde sý basqan úılerdi tehnıkalyq tekserý jáne baǵalaý jumystarynyń qarqyny tómen. Osy oraıda qajetti qorytyndyny múmkindiginshe qysqa merzimde berý kerek. Mysaly, Batys Qazaqstan oblysynda 4 myń sý basqan úıdiń 54%-y, atap aıtqanda tek 2176 úı tekserilip, 770 úıdiń quny baǵalandy. Aqtóbe oblysynda úılerdiń 73%, ıaǵnı 3679 úı tekserilip, onyń ishinde 1673 úıge baǵa berildi. Al Atyraý, Aqmola, Qostanaı jáne Soltústik Qazaqstan oblysynda sý basqan úılerdi tekserý jáne baǵalaý jumystary aıaqtaldy», — dedi Qanat Bozymbaev Úkimet otyrysynda.

Vıtse-premer málimetinshe, sý basqan óńirlerde 9 myńnan astam úıdi jóndeý kerek jáne 4 315 úı apatty dep tanylǵan. 

«Qazir óńirlerde 1847 úı men páterdiń qurylysy bastaldy jáne buryn paıdalanýǵa berilgen 3417 páter men úı satyp alý josparlanǵan. Óńir ákimderi qurylys jumystaryn keshiktirmeýge basa nazar aýdarýy kerek. Jańa oqý jylyna deıin tasqyn sýdan zardap shekken turǵyndar baspanaly bolýy qajet. Bul baǵyttaǵy jumys jalǵasyp jatyr jáne erekshe baqylaýda», — deıdi ol.

Buǵan deıin Q. Bozymbaev sý tasyǵan óńirlerde 30 myńnan astam otbasy birjolǵy tólem alǵanyn aıtqan edi.