Sýarmaly jerlerdi aınalymǵa engizý qandaı ekonomıkalyq áser beredi
«Qazirgi ýaqytta Qazaqstanda 1,5 mln gektar sýarmaly jer bar. Olardyń basym bóligi ońtústik oblystarǵa tıesili. Ótken jyly sol jerlerdi sýarý úshin 12,3 mlrd tekshe metr sý jumsaldy. Bul elimiz boıynsha tutynatyn sýdyń 67 paıyzyn quraıdy. 2015 jyly Elbasy Nursultan Nazarbaev sýarmaly jerdiń kólemin 2 mln gektarǵa deıin ulǵaıtýdy tapsyrǵan bolatyn. Byltyr Memleket basshysy Qasym-Jomart Toqaev bul kórsetkishti 2030 jylǵa deıin 3 mln gektarǵa jetkizsin dep tapsyrdy. Bul búkilálemdik tendentsııaǵa sáıkes kelip tur. Bárimizge málim, sýarmaly jerlerden shyǵatyn ónimniń kólemi sýarylmaıtyn jerlermen salystyrǵanda ortasha eseppen 2 ese joǵary», - dep toqtaldy mınıstr.
Onyń sózine qaraǵanda, sońǵy 50 jylda álemde sýarmaly jerlerdiń kólemi 2,2 esege artty. Osynyń arqasynda osy jerlerde gektardan alynatyn ónim 40 paıyzǵa ósti. Azııalyq aımaqta bul kórsetkish eleýli kóterildi. Ásirese Qytaı men Úndistannyń úlesi basym bolyp tur. Birikken Ulttar uıymynyń málimeti boıynsha, 2050 jylǵa qaraı álemde sýarmaly jerlerdiń kólemi 6 paıyzǵa ósip, jerdiń ónimdiligi 38 paıyzǵa artady.
«Sýmen qamtamasyz etýdi arttyrý jáne qalpyna keltirý úshin Almaty, Jambyl, Túrkistan, Qyzylorda jáne Aqtóbe oblystary boıynsha kólemi 492 myń gektar sýarmaly jerlerde tıisti jobalar iske asyrylýda. Olar qarjylandyrý kózderine baılanysty 4 baǵytqa bólingen. Jalpy somasy 274 mlrd teńgeni quraıdy. 2020-2022 jyldar aralyǵynda 6 785 shaqyrym kanal, 4 sý qoımasy, 4 sý toraby, 239 drenaj uńǵymasy jáne 23 myń ózge de sý sharýashylyq nysandary salynyp, ári qaıta jańartylady», - dedi M. Myrzaǵalıev.
Osy oraıda ol barlyǵy 88 myń jumys oryny qurylatynyn, sonyń ishinde 11 myń jumys orny qurylys kezinde paıda bolatynyn aıtty.
«Budan basqa, bul qurylys materıaldaryn óndirý, tehnologııalyq jabdyqtar men tehnıkany jetkizý boıynsha aralas salalardyń jumysyn jandandyrýǵa qosymsha múmkindik beredi. Eń bastysy, qalpyna keltirilgen sýarmaly jerlerdi aınalymǵa engizý barysy aýyl sharýashylyǵynda 77 myń turaqty jumys ornyn qurýǵa múmkindik beredi.Osy jerlerdegi aýyl sharýashylyǵy jalpy óniminiń kólemi jylyna 165 mlrd teńgeni quraıdy. Ol óz kezeginde saýda, ónimdi qaıta óńdeý, mal sharýashylyǵy salalarynda odan ári mýltıplıkatıvtik áser etedi. Jobalardy iske asyrý úshin halyqaralyq qarjy ınstıtýttarynan da, respýblıkalyq bıýdjetten de qarajat jumsalady», - dedi mınıstr.