Sýarmaly sý shyǵynyn azaıtý úshin ne istelýde – mınıstr jaýaby

NUR-SULTAN. QazAqparat – 2030 jylǵa deıin sý únemdeý tehnologııalary qoldanylatyn alań kólemi 750 myń gektarǵa jetkiziledi. Bul týraly Úkimet otyrysynda QR Ekologııa, geologııa jáne tabıǵı resýrstar mınıstri Maǵzum Myrzaǵalıev aıtty, dep habarlaıdy QazAqparat tilshisi.

«Memleket basshysy Joldaýynda atap ótkendeı, búgingi kúni sýarmaly sýdyń shyǵyny - 40 paıyz. Shyǵyndy azaıtý úshin ne jasalýda? Birinshiden, 6 785 shaqyrymnan astam sýarý jelilerin qaıta qurý jáne salý boıynsha jumys júrgizilýde. Bul sý shyǵynyn 40 paıyzdan 17 paıyzǵa deıin nemese jylyna 1,5 mlrd tekshe metrge deıin tómendetýge múmkindik beredi. Ekinshiden, aýyl sharýashylyǵy taýar óndirýshilerin sýmen qamtamasyz etýdi jaqsartý maqsatynda sýdy tsıfrlandyrý jáne esepke alýdy jappaı engizý josparlanýda», - dedi Maǵzum Myrzaǵalıev.

Máselen, onyń dereginshe, Túrkistan oblysyndaǵy K-19 arnasynda tsıfrlandyrý boıynsha pılottyq joba iske asyrylýda. Testilik rejımde aýyl sharýashylyǵy kooperatıvteriniń birine tólengennen 2 ese kóp sý jiberilgeni anyqtaldy. Oń nátıje kórsetken osy pılottyq joba aıasynda birneshe jyldar ishinde respýblıkadaǵy basqa arnalar da tsıfrlandyrylady.

«Qazirgi ýaqytta mınıstrlik ákimdiktermen birlesip vegetatsııalyq kezeńniń qorytyndylaryna taldaý júrgizilýde. Onyń nátıjeleri boıynsha ákimdikterge sýdy az tutynatyn daqyldarǵa kóshý jáne ylǵal únemdeýshi tehnologııalardy engizý boıynsha tıisti usynymdar jiberiletin bolady. 2030 jylǵa deıin sý únemdeý tehnologııalary qoldanylatyn alańdy qazirgi 220 myńnan 750 myń gektarǵa deıin jetkizý josparlanyp otyr», - dedi mınıstr.