«Sý joq» degen syltaý emes pe? - baspasózge sholý
«Egemen Qazaqstan» gazetiniń habarlaýynsha, Maqtaaral aýdany maqtadan bólek, endi qaýyn men qarbyzdy eksportqa shyǵarady. Bıyl aýdanda 136,4 myń gektar sýarmaly egistiktiń 83,5 myń gektaryna maqta shıti ornalastyrylsa, 27 myń gektaryna baqsha, 4,8 myń gektaryna kókónis, taǵy basqa daqyldar egilgen eken. «Maqtaaral aýdany ekonomıkasynyń kúretamyry bolyp tabylatyn aýyl sharýashylyǵynda tyń jobalar, órkendi ister qanat jaıyp, jańa ınnovatsııalyq ádis-tásilder boıynsha jumys júrgizýge basa mán berilýde. Baǵa dıqandar úshin óte tıimdi bolyp tur. Qaýyn-qarbyz elimizdiń soltústik oblystaryna jáne alys-jaqyn shet memleketterge jóneltilýde», - dep habarlaıdy basylym. «Qaýyn-qarbyz eksportqa shyǵarylýda» degen maqalany oqı otyryp, Máskeý men Belarýssııaǵa ketken alǵashqy eksporttar týraly tolyǵyraq málimet ala alasyzdar.
Sondaı-aq, bas basylym Mańǵystaý óńirin kógaldandyrý máselesine nazar aýdaryp otyr. «Ras, Mańǵystaý klımaty jaǵynan shóldi aımaq. Jańbyry sırek dalanyń ón boıynda ózen, kól syndy tabıǵı sý kózderi taǵy joq. Іrgede tolqyny týlap jatqan qart Kaspııdiń telegeı sýyn kez kelgen maqsatta kádege jarata berý múmkin emes. Tuzdylyǵy joǵary tuıyq teńiz kózinen alynǵan sýdy arnaıy qondyrǵylar arqyly tuşytyp, Aqtaý turǵyndaryn aýyz sýmen qamtyp otyrǵanyna shúkir deýge týra keledi. Bul jaǵdaı aımaqtyń, ásirese, oblys ortalyǵy Aqtaý qalasynyń jasyl jelek jamylyp turmaı, «jalańash qala» atanýyna sebep. Aqtaýdyń jasyl qala emes ekendigi kelip-ketýshi qonaqtardyń aldymen kózine shalynyp, kóńilin júdetedi» dep jazady gazet tilshisi. Biraq, jyl saıyn oblys ortalyǵyn kógaldandyrý, abattandyrý maqsatynda qyrýar qarjy qaralyp, eńbek kúshteri jumyldyrylyp, birneshe myńdaǵan túp aǵash túrleri men butalar otyrǵyzylyp jatady. «Tipti, olardyń esebiniń kóptigi sondaı, birneshe jyldarǵy eńbektiń nátıjesinde endigi Aqtaý kók shóppen kómkerilgen, kúlteli gúlderi qulpyryp, san túrli aǵashtary kókpen talasqan kórikti qalaǵa aınalýy kerek edi...» degen basylym ókinishke qaraı, olaı emes ekendigin aıtyp, másele qozǵap otyr. Bul týraly tolyǵyraq «Sý joq» degen syltaý emes pe?» atty maqaladan oqı alasyzdar.
***
Qazaqstan, Reseı, Belarýssııa, Qytaı, Pákistan, Ulybrıtanııa men AQSh-tyń arnaıy bólimsheleriniń qyzmetkerleri Spassk áskerı polıgonynda ótip jatqan «Altyn úki-2016» mergender jarysynda kúsh synasyp jatyr eken. Bul týraly «Ekspress K» gazeti habarlap otyr. «Bul jattyǵýlardyń basty maqsaty mergenderdiń denesin shynyqtyryp, olardyń tózimdigin arttyrý. Tipti, psıhologııalyq jattyǵýlar arqyly, olardy sabyrǵa úıretý. Sondaı-aq mergender arasynda naǵyz mergendi anyqtap, marapattaý kózdelgen» dep jazady basylym. Bul týraly tolyǵyraq gazettiń búgingi sanyndaǵy «Snaıpery ne pıýt moloko» atty maqaladan oqı alasyzdar.
***
«Vremıa» basylymynyń habarlaýynsha, WBA (Super), IBO, WBC jáne IBF nusqalary boıynsha álem chempıony Gennadıı Golovkın byltyr 10 mln teńgeden astam salyq tólegen. Bul týraly basylymǵa Almaty qalalyq memlekettik kiris departamenti basqarmasynyń basshysy habarlaǵan eken. Basylymnyń habarlaýynsha, ataqty ánshiler, atap aıtsaq, Dılnaz Ahmadıeva, Búrkit, Ashat Tarǵynovtar áli kúnge deıin salyqtan jaltaryp, ózderin jeke kásipker retinde tirkemeı júr eken. Bul týraly tolyǵyraq «Vremıa» basylymynyń búgingi sanynan oqı alasyzdar.