Sý tasqyny merzimderin belgileý qajet - Qanat Bozymbaev
«30 jyldan astam baqylaý derekteri boıynsha sý tasqyny merzimderin belgileý qajet dep sanaımyn. Jazyq ózenderde negizinen naýryz aıynyń 3-shi onkúndiginen sáýir aıynyń 3 onkúndigi aralyǵynda sý tasıdy. Aqpan aıynda qar erý jaǵdaılary baıqalǵan joq», - dedi mınıstr.
Onyń dereginshe, topyraqtyń qatý tereńdigi Aqmola oblysynda 105-ten 131 sm-ge deıin, Qaraǵandy oblysynda 75-ten 130 sm-ge deıin, Qostanaı oblysynda 92-den 140 sm-ge deıin jáne Soltústik Qazaqstan oblysynda 103 sm-ge deıin qalyńdyqty quraıdy.
Sonymen qatar, mınıstr taý ózenderindegi qar kólemine qatysty derektermen bólisti. Máselen, Talas Alataýynyń soltústik-batys silemderinde qar kólemi normadan 10 paıyz joǵary bolsa, Qarataý jotasynyń ońtústik-batys betkeıinde normadan 58 paıyzǵa tómen bolyp otyr. Al Almaty oblysy boıynsha Іle Alataýynyń soltústik betkeıinde qar kólemi normadan 10 paıyzǵa joǵary, Jetisý Alataýynda normadan 10, Іle Alataýynyń ońtústik betkeıinde jáne Ketmen jotasynyń soltústik betkeıinde normadan 6 paıyzǵa tómen.
«Buqtyrma sý qoımasynda jáne Shyǵys Qazaqstan oblysy Shúlbi sý qoımasyna quıylatyn aımaqtarda qar kólemi normadan 30 paıyzǵa, Tarbaǵataı jotasynyń ońtústik-batys baýraıynda normadan 36 joǵary, al Ertistiń sol jaǵalaýynda normadan 6 paıyzǵa joǵary. Jambyl oblysy Qarataý jotasynyń soltústik-shyǵys betkeıinde jáne Qyrǵyz jotasynyń soltústik betkeıinde qar kólemi normadan 40 paıyz az. 2019 jyldyń aqpan aıynda qar jınalý protsesi jalǵasýda», - dedi ol.
Q.Bozymbaevtyń aıtýynsha, Syrdarııa, Shý, Talas, Jaıyq, Ertis jáne Іle transshekaralyq ózenderiniń 75-95 paıyzy aǵysy kórshi memleketterdiń sý qoımalarynda qalyptasyp, retteledi.
«Osyny eskerip aǵyn kólemi men sý qoımalarynyń jumys rejımi bıyl naýryzdan mamyrǵa deıin Memleketaralyq birlesken komıssııada sý resýrstaryn basqarý salasyndaǵy ýákiletti memlekettik organdardyń kelisimimen anyqtalyp, bekitiledi», - dedi ol.