Sý tasqyny qaýpi bar jerge úı salýǵa jol bergen laýazymdy tulǵalar jazasyn alýy tıis – Májilis depýtaty
«Jyl saıyn bolatyn sý tasqyndary azamattarymyzdyń ómiri men múlkine qaýip tóndirip qana qoımaı, otandastarymyzdyń moraldyq-psıhologııalyq deńgeıine de keri áser etýde. Úkimet, sý tasqynyna qarsy júzdegen mıllıard teńge bóledi. Alaıda, nátıje joq dese bolady. Mysaly, bıyl Aqtóbe oblysynyń Qobda aýdanynda sý tasqynynan 79 úı, dámhana, mektep pen sport kesheni, al Oıylda 25 úı zardap shekti. Batys Qazaqstan oblysynyń Aqsaı qalasy men janyndaǵy aýyldarda 180-ge jýyq úıdi sý basty. Sonymen qatar, Atyraý oblysy, Qyzylqoǵa aýdany, Mııaly aýylynda jaýǵan jańbyr men erigen qar sýy saldarynan 2 ret sý tasqyny bolyp, tas jol buzylyp, mańyndaǵy aýyldarǵa qaýip tóndirgen. Ol 259 otbasynyń ǵana kóz-jasy emes, tutas halyqtyń basyndaǵy qıyndyq», - dedi Úkimet basshysynyń birinshi orynbasary Roman Sklıardyń atyna depýtattyq saýal joldaǵan Ǵalymjan Eleýov.
Onyń atap ótýinshe, «AMANAT» partııasy zardap shekken turǵyndarǵa qurylys materıaldarymen kómek kórsetýde.
«Sý keter. Sý ketkenmen úılerden dymqyl ketpeıdi, adamdardyń júreginde syzat qalady, azamattar úıdegi dymqyldan týberkýlezge, basqa da psıhologııalyq qysymǵa dýshar bolady. Osy oraıda mynadaı suraq týyndaıdy - biz nege jyl saıyn ózimizdiń azamattardy osyndaı qıyn jaǵdaıda qaldyramyz? «AMANAT» fraktsııasy Úkimet sý tasqynyna qarsy kelesi is-sharalardy shuǵyl qabyldaýy qajet dep esepteıdi: Birinshiden, Úkimet jergilikti atqarýshy organdarmen birlesip, Aqtóbe, Batys Qazaqstan, Atyraý oblystaryndaǵy tasqynnan zardap shekken barlyq otbasyǵa jedel túrde materıaldyq kómek kórsetýi tıis. Ekinshiden, tasqynnyń saldarynan baspanasynan aırylǵan azamattarǵa jedel úı salyp berý basty mindet. Úshinshiden, elimizdiń barlyq aýmaǵynda Sý tasqyny qaýpi bar jerlerdiń kartasy jasalýy qajet», - dedi ol.
Májilis depýtatynyń atap ótýinshe, tórtinshiden, sý tasqyny qaýpi bar jerlerdiń barlyǵynda tasqynnan qorǵaıtyn dambalar, kontrregýlıatorlar, sý ótetin ótkelder salý asa mańyzdy. Tasqynnyń saldarymen kúrespeı, onyń aldyn alý qajet.
«besinshiden, jaz kezinde Qazaqstanda sý resýrstarynyń jetispeıtindigin eseptesek, jańa damba, plotınalar salý eldi mekenderdi qorǵap qana qoımaı, aýyl sharýashylyǵyna kómektestetini anyq. Altynshydan, sý tasqyny qaýpi bar kóptegen jerlerde jergilikti atqarýshy bılik úı salýǵa jol bergen. Sonyń nátıjesinde jeke tulǵalarǵa da, memleketke de orasan zor shyǵyn kelip otyr. Bul jerlerdi kim bergenin tekserip, zańsyzdyqqa jol bergen laýazymdy tulǵalar jazasyn alýy tıis», - dedi Ǵalymjan Eleýov.