Sý tasqyny: Aqtóbe oblysynyń Oıyl, Qobda aýdandarynda shyǵyn eseptelýde

AQTÓBE. QazAqparat – Aqtóbe oblysynyń Oıyl jáne Qobda aýdandarynda sý tasqynynan keıingi zalal shyǵyny eseptelip jatyr. Qazir Oıyldaǵy jalpy shyǵyn shamamen 31 mln teńgeni qurap otyr, dep habarlaıdy QazAqparat tilshisi.

Qobda aýdanynda 14 naýryz kúni, Oıyl aýdanynda 20 naýryz kúni tótenshe jaǵdaı jarııalandy. Oblys ákiminiń baspasóz qyzmetinen málim etkendeı, tótenshe jaǵdaı rejımi áli alynbady.

«Qazirgi kezde eki aýdanda da shyǵyn eseptelip jatyr. Oıyl aýdanynda shyǵyn 31 mln teńge boldy. Degenmen komıssııa jumysy áli tolyq aıaqtalǵan joq. Sondyqtan shyǵyn kólemi artýy múmkin», - dep habarlady oblys ákimi apparaty basshysynyń orynbasary, baspasóz qyzmetkeri Erjan Baıtanaev.

Aıta keteıik, Oıyl aýdanynda barlyǵy 11 úıge, 12 aýlaǵa sý kirgen. Oblys ákimi Eraly Toǵjanov úıi sý astynda qalǵan 11 otbasyna 500 myń teńgeniń setıfıkatyn tabystady. Shyǵyn eseptelgen soń memleketten qarjylaı kómek alady. Al Qobda aýdanynda 70-ten astam úıge sý kirdi. Onda baspanasy qulaǵan jáne apatty jaǵdaıǵa túsken 24 otbasyna úı salý jumysy júrip jatyr. Qurylys maýsym aıyna deıin aıaqtalyp, qoldanysqa berilmek. Bıyl kóktemgi sý tasqyny kezeńinde respýlıkalyq 5, oblystyq jáne aýdandyq mańyzy bar 7 joldy sý basyp qaldy. Saldarynan birneshe aýylǵa qatynas ýaqytsha shekteldi.