Sý tasqynynyń aldyn alý: ShQO-da 228 kópir qardan tazartyldy

<p>ÓSKEMEN. KAZINFORM &ndash; Shyǵys Qazaqstan oblysynda sý tasqynynyń aldyn alý maqsatynda birqatar shara qolǵa alynǵan.</p>

Búgingi tańda oblys boıynsha Kúrshim, Altaı jáne Glýbokoe aýdandarynda qar mol jatyr.

Bul týraly ShQO aımaqtyq kommýnıkatsııalar qyzmetinde ótken baspasóz máslıhatynda aıtyldy. 

«Qazirgi ýaqytta jergilikti atqarýshy organdar sý tasqynynyń aldyn alý sharalaryn júrgizýde. Barlyǵy 204 myń tekshe metr qar shyǵarylyp, 258 aryq, 1259 sý ótkizý qurylysy men 228 kópir tazartyldy», — deıdi ShQO ákimi apparaty jumyldyrý daıyndyǵy bóliminiń basshysy Erken Sársembınov.

Altaı aýdanyndaǵy Buqtyrma ózeninde, Kúrshim aýdanyndaǵy Kúrshim ózeninde, Shemonaıha aýdanyndaǵy Úbe ózeninde, Glýbokoe aýdany men Rıdder qalasynda muzdy usaqtaý úshin jarylys jasaldy.

Jaǵdaı qıyndap ketse jergilikti atqarýshy organdar men azamattyq qorǵaý qyzmetteri arasynan 2334 adam, 735 tehnıka, 61 júzý quraly men 223 motopompa saqadaı saı tur.

Sý tasqyny saldaryn joıý jáne halyqty evakýatsııalaý úshin TJD-da ótimdiligi joǵary 26 tehnıka bar.

«Altaı jáne Kúrshim aýdanynda sý tasqynyna qarsy jumystarǵa monıtorıng júrgizý jáne qajet kezde kómek kórsetý úshin Semeıden 68303 áskerı bóliminiń qyzmetshileri jiberildi. Qazirgi ýaqytta olar jergilikti atqarýshy organdarǵa aryqtar men kanaldardy tazartýǵa kómektesýde. Búgingi tańda Altaı aýdanynda 4 sý ótkizý qubyry, 60 metr aryq, al Kúrshim aýdanynda 250 metr aryq tazartyldy», — deıdi oblystyq TJD tótenshe jaǵdaılardyń aldyn alý basqarmasy bastyǵynyń mindetin atqarýshy Dına Beksultanova. 

Óńir boıynsha qalalar men aýdandardyń ákimdikteri sý tasqyny bolǵan jaǵdaıda halyqty ýaqytsha ornalastyratyn 153 pýnkt ázirledi.

Oǵan jalpy 17 myńnan astam adam syıady.