Sý tasqynynan zardap shekken Jalaýly aýylynyń bes otbasyna jańa úılerdiń kilti tabystaldy

<p>PAVLODAR. KAZINFORM - Pavlodar oblysy Jalaýly aýylynda tasqyn sýdan zardap shekken 5 otbasyǵa jańadan úıler salynyp berildi. Óńir ákimi Asaıyn Baıhanov búgin qýanysh ıelerine baspanalardyń kiltin saltanatty túrde tabys etti.</p>

Eske sala keteıik, Bıylǵy sáýir aıynda sý tasqynyna baılanysty Aqtoǵaı aýdany Jalaýly aýylynda tótenshe jaǵdaı jarııalanǵan edi.

Keıin sý tasqyny kezinde zardap shekken jáne komıssııanyń sheshimimen turýǵa jaramsyz dep tanylǵan 5 úı anyqtalyp, olardyń ornyna jańa qurylystar salyna bastady. 

Jalaýly aýylynyń jurty búgin baspana toıyna jınaldy. Úıleri tasqynnan zardap shekken 5 otbasyǵa jańadan salynǵan sapaly úıler paıdalanýǵa berildi. «Stalmontaj» JShS áýel basta qurylysy 3 aıǵa josparlanǵan baspanalardy 2 aıdyń ishinde aıaqtap úlgerdi.

Abaı kóshesindegi dóńesteý tusta paıda bolǵan jańa úıler jaıly etip turǵyzylǵan.

— Bıyl bizdiń oblysymyz birneshe tótenshe jaǵdaıǵa tap boldy. Sonyń ishinde kóktemgi sý tasqyny eldi mekenderimizge az shyǵyn ákelgen joq. Memleket basshysy Qasym-Jomart Toqaev barlyq zardap shegýshilerge kómektesýdi tapsyrǵan bolatyn. Biz aýyldyq jerlerdiń turǵyndaryna jan-jaqty kómek kórsetýge barlyq kúsh-jigerimizdi shoǵyrlandyrdyq. Jalaýly aýyly turǵyndarymen buǵan deıingi kezdesýde qatty alańdaýdyń qajeti joq ekenin aıtyp, az ýaqyttyń ishinde barlyǵyn retke keltiremiz dep ýáde etkenmin. Aýyl jurtyna tótennen kelgen apattyń saldaryna moıynsunbaı, qıyndyqtarǵa tótep bergeni úshin, al óńirimizdiń ózge azamattaryna kórsetkeni kómekteri men demeýshilikteri úshin alǵys aıtamyn. Jańa úılerge qonystanǵan shańyraqtardyń yrys-berekesi arta bersin, - dedi baspanalardyń kiltin tabystaý saltanatynda Pavlodar oblysynyń ákimi Asaıyn Baıhanov.

Atap óteıik, atalǵan baspanalardy oblystyq ákimdikpen jasalǵan memorandým aıasynda ERG kompanııasy óz qarajatyna salyp shyqty. Qurylysyna 100 mln teńge bólindi. Demeýshiler, sonyń ishinde depýtattar aýyl turǵyndaryna tońazytqysh, teledıdar, salqyndatqysh jáne ózge úıge qajet tehnıkalardy satyp alyp berdi. Qurylysty salǵan «Stalmontaj» JShS barlyq úıdiń sapasyna ómir boıyna kepildik berip otyr.

Eske sala keteıik, Sý tasqynynan búlingen ınfraqurylymdy qalpyna keltirýge Úkimet rezervinen 48,7 mlrd teńge qarajat qajet. 

Foto: