Sý tasqynynan keıin turǵyn úılerdi salý men jóndeý nátıjesi qandaı
«2024 jylǵy 7 qazandaǵy jaǵdaı boıynsha 17 603 turǵyn úıge zaqym keldi (11 987 – turǵyn úı, 5 616 – jalǵyz baspana dep tanylǵan saıajaı). Barlyq nysandar boıynsha tehnıkalyq tekserý jáne baǵalaý júrgizildi. Tekserý nátıjesi boıynsha 9 156 úı jóndeýge jaramdy. Sondaı-aq, 8 447 úı qalpyna keltirýge jaramsyz, olar boıynsha qaıtalama naryqta 5 767 úı men páter satyp alý jáne úlgilik joba boıynsha 2 680 úı salý josparlanǵan. Sý tasqynynan zardap shekkenderdi turǵyn úımen qamtamasyz etý úshin óńirlerdiń ákimdikteri barlyq josparlanǵan úılerdiń qurylysynyń basym bóligin aıaqtady, ıaǵnı 2 655 úı (99%) salyndy», - delingen mınıstrliktiń Kazinform agenttigine bergen jaýabynda.
Vedomstvo aqparatyna qaraǵanda, Aqmola oblysynda – 330 úı, Aqtóbe oblysynda – 500, Atyraý oblysynda – 100, BQO-da – 864, Qostanaı oblysynda – 153, Pavlodar oblysynda – 5 úı, SQO-da – 700, sondaı-aq Ulytaý oblysynda 3 úıdiń qurylysy qamtyldy. Qalǵan úılerdi bıylǵy 15 qazanǵa deıin tapsyrý josparlanǵan.
Budan bólek, qaıtalama naryqta 5 767 úı men páter satyp alyndy (100%). Osy turǵyda Aqmola oblysynda 221 úı, Aqtóbe oblysynda – 513, Atyraý oblysynda – 1 376, BQO-da – 1 939, Qostanaı oblysynda – 315, Qaraǵandy oblysynda – 6, Pavlodar oblysynda – 1, Ulytaý oblysynda – 2, SQO-da 1 394 úı tapsyryldy.
«Barlyq 9 156 úı boıynsha jóndeý jumystary aıaqtaldy (100%). Bul rette, Abaı oblysynda – 16 úı, Aqmola oblysynda – 715, Aqtóbe oblysynda – 3 074, Atyraý oblysynda – 1 198, BQO-da – 1 343, Qostanaı oblysynda – 815, Qaraǵandy oblysynda – 47, Pavlodar oblysynda – 32, Ulytaý oblysynda – 17, SQO-da 1 899 úı jóndeldi», - dep atalyp ótken Ónerkásip jáne qurylys mınıstrligi málimetinde.
Aıta keteıik, jaqynda Memleket basshysy Qasym-Jomart Toqaev Qazaqstan kóktemgi sý tasqyny saldaryn ózgeniń kómeginsiz eńsere alǵanyn aıtty.