Sý tasqynynan keıin 8,8 myńnan astam qazaqstandyq otbasy memlekettik qoldaý aldy

<p>ASTANA. KAZINFORM - Qazaqstanda joıqyn sý tasqyny saldarynan zardap shekken azamattardyń shyǵynyn óteý protsesi jalǵasyp jatyr. Úkimet bul jumystardy Memleket basshysy Qasym-Jomart Toqaevtyń tapsyrmasy boıynsha júrgizýde.</p>

«Atyraý, Batys Qazaqstan, Qostanaı, Soltústik Qazaqstan jáne elimizdiń basqa da oblystarynyń turǵyndary arnaıy qurylǵan óńirlik komıssııalarǵa tıisti ótinishterin berip jatyr. Búgingi tańda 16 862 ótinish kelip túsken.

Aǵymdaǵy jyldyń 20 sáýirindegi jaǵdaı boıynsha 8 814 otbasy jalpy somasy shamamen 3,2 mlrd teńge bolatyn 100 AEK kólemindegi birjolǵy tólem aldy. 2 myńnan astam otbasy keltirilgen materıaldyq shyǵyn úshin 1 mlrd teńgege jýyq ótemaqy aldy. Mal shyǵyny úshin berilgen ótemaqynyń jalpy somasy 89 mln teńgege jetti», — dep jazdy Úkimettiń baspasóz qyzmetinen.

Qazirgi tańda zardap shekken óńirlerde 3210 turǵyn úı tekserilip, olardyń 1969-yna baǵalaý júrgizildi.

311 úıde jóndeý jumystaryn júrgizý úshin 447 mln teńgeden astam qarjy bólindi.

35 otbasyǵa eski úıdiń ornyna jańa baspana jáne páterler berildi.

Keltirilgen shyǵyndy óteý jumystary jalǵasyp jatyr jáne olar Úkimettiń qatań baqylaýynda. El Prezıdentiniń tapsyrmasy boıynsha barlyq zardap shekken azamattarǵa jan-jaqty kómek pen qoldaý kórsetiledi.