Sý tasqynynan keıin 5,8 myńnan astam qazaqstandyq otbasy memlekettik qoldaý aldy

<p>ASTANA. KAZINFORM &mdash; QR Úkimeti Memleket basshysy Qasym-Jomart Toqaevtyń tapsyrmasy boıynsha joıqyn sý tasqyny saldarynan zardap shekken azamattarǵa keltirilgen zalaldy baǵalaý jáne óteý boıynsha jumystar júrgizýde.</p>

Búginde arnaıy qurylǵan óńirlik komıssııalarǵa Aqmola, Aqtóbe, Atyraý, Batys Qazaqstan, Qaraǵandy, Qostanaı, Pavlodar, Soltústik Qazaqstan, Abaı jáne Ulytaý oblystarynyń turǵyndarynan 13 577 ótinish túsken.  5 803 otbasy 100 AEK nemese 369 200 teńge kóleminde jalpy somasy 2 mlrd teńgeden astam birjolǵy tólem aldy. 877 otbasyǵa keltirilgen materıaldyq shyǵyn úshin jalpy somasy 380 mln teńge ótemaqy tólendi. Mal shyǵyny úshin berilgen ótemaqynyń jalpy somasy 38,9 mln teńgege jetti.

18 sáýirindegi jaǵdaı boıynsha, zardap shekken óńirlerde 2602 turǵyn úı tekserilip, olardyń 1499-yna baǵalaý júrgizildi. Nátıjesinde 794 úı jóndeýge keletini, 701 baspananyń qalpyna keltirýge jaramsyz ekeni anyqtaldy. Qazirgi ýaqytta 197 otbasyǵa baspanalaryn jóndeý úshin jalpy somasy 218,6 mln teńge ótemaqy tólendi. 33 otbasyǵa qıraǵan úıdiń ornyna jańa baspana jáne páterler berildi.

Pavlodar, Qaraǵandy jáne Aqtóbe oblystarynda turǵyn úılerdiń qurylysy bastaldy.

Baǵalaý jáne zalaldy óteý boıynsha tıisti jumystar jalǵasyp jatyr. QR Prezıdenti atap ótkendeı, barlyq zardap shekken azamattarǵa memleket tarapynan jan-jaqty qoldaý kórsetiledi.

«Úkimet zardap shekken azamattardyń barlyǵyna qoldaý kórsetedi. Biz sý tasqyny saldarynan bolǵan barlyq shyǵyndy óteımiz. Árbir azamat, árbir otbasy memlekettiń qamqorlyǵynda bolady. Bul – men úshin basty mindet», — dedi Qasym-Jomart Toqaev Soltústik Qazaqstan oblysynyń evakýatsııalanǵan turǵyndarymen kezdesýinde.

Eske sala keteıik, buǵan deıin sý tasqyny saldarynan kelgen zalalǵa ótemaqy alý úshin is-qımyl algorıtmi jarııalanǵan bolatyn.