Sý tasqynynan keıbir óńirlerde UBT-ǵa sapaly daıyndyq bolmaýy múmkin – senator
Senatordyń aıtýynsha, tasqyn sý saldarynan elimizdegi kóptegen mektepter oqýshylardy qashyqtan oqytýǵa kóshken. Memlekettik bilim berý granttary boıynsha konkýrsqa qatysýǵa arnalǵan UBT-ǵa daıyndyqty tótenshe jaǵdaı ózgertip jiberdi. Sonyń saldarynan oqýshylardyń aldaǵy testige sapaly daıyndalýǵa múmkindigi de, jaǵdaıy da joq.
«Balalardy UBT-ǵa daıyndaý salasyndaǵy retteýdi memlekettik organdardyń birde-bireýi júzege asyrmaıdy. Óıtkeni Oqý-aǵartý mınıstrliginde de, Ǵylym jáne joǵary bilim mınıstrliginde de bul mindet kózdelmegen. Talapkerler bir mekemege oqýshy emes, ekinshisi úshin áli stýdent emes. Osyǵan baılanysty zardap shekken aımaqtardaǵy oqý bitiretin túlekteriniń taǵdyryna alańdap otyrmyz. Tabıǵı apatqa baılanysty bul balalardyń ulttyq biryńǵaı testileýde tómen nátıje alý qaýpi bar. Sondyqtan olar memlekettik bilim granttaryn ala almaı qalýy sózsiz», - dedi Ǵ. Sarybaev Úkimet basshysy Oljas Bektenovtiń atyna joldaǵan saýalynda.
Depýtat osyǵan baılanysty talapkerlerdi daıarlaý máselesin sheshý sharalary týraly aıtty. Ásirese, túlekterdiń qujattaryn tezirek qalpyna keltirýge járdemdesý týraly mınıstrlikterge usynys aıtyldy. Testileýdiń ekinshi kezeńiniń basynda UBT ótkizý pýnktteriniń qyzmetin qalpyna keltirý qajet ekeni atap ótildi.
«Oqý-aǵartý, sondaı-aq Ǵylym jáne joǵary bilim mınıstrlikteri qalyptasqan jaǵdaıdy nazarǵa ala otyryp, túlekterdi UBT-ǵa daıarlaýǵa ári olardyń joǵary oqý oryndaryna túsýine járdemdesý jaǵyn qarastyrýy tıis», - dedi senator.