Sý tasqynymen kúres birligimizdi nyǵaıtty – Petropavl turǵyny

<p>PETROPAVL. KAZINFORM &ndash; El turǵyndary qıyn-qystaý sátte bir jeńnen qol, bir jaǵadan bas shyǵaryp, qoldarynan kelgenshe járdem berýde. Petropavlda áleýmettik jelide kómek usynǵan habarlandyrýlar kóbeıdi. Bireýi qaýipti aýmaqtan kóshirilgenderge ýaqytsha turýǵa tegin baspana usynsa, kóligi barlar zattardy qajetti jerge jetkizip bermek. Solardyń biri &ndash; &laquo;Vnedorojnık 4h4&raquo; avtoklýbynyń músheleri. Petropavl turǵyny Andreı Stelmah tilshige suhbat berdi.</p>

- Andreı, sizder óńir turǵyndary arasynda alǵashqylardyń biri bolyp sý tasqynyna qarsy kúreste óz kómekterińizdi usyndyńyzdar. Sizder qandaı járdem berdińizder?

- Oblys aýdandaryn sý basyp jatqan ýaqytta qol qýsyryp qarap otyra almadyq. Klýb músheleri jınalyp, adamdardy evakýatsııalaýǵa, dúnıe-múlikterin, úı janýarlaryn kóshirýge kómektesemiz dep sheshtik. Bul jumysqa avtoklýbtan 7 mashına jáne 20 adam qatysty. Júk tasýǵa yńǵaıly bolýy úshin jylqy tasýǵa arnalǵan tirkemesi bar ÝAZ patrıot, nıva, eki gazel, ÝAZ tabletkalar shyqty. Usaq zattardy jol talǵamaıtyn kóliktermen tasydyq.

Ol úshin áleýmettik jelide habarlandyrý ornalastyryp, kimge evakýatsııalaýǵa kómek kerek, habarlasýlaryn suradyq. Telefon nómirlerimizdi kórsettik. Birinshi kezekte áleýmettik az qamtylǵan otbasylarǵa, jalǵyzilikti qarttarǵa kómegimizdi usyndyq.

Foto: Keıipkerden

- Habarlasqandar kóp boldy ma?

- Iá, úsh kún boıy toqtaýsyz jumys istedik. Búgin ǵana azdap saıabyrsydy. Yńǵaıly bolý úshin arnaıy vatsap grýppa ashyp, shaqyrtýlardy, bar málimetti sonda salyp otyrdyq. Qandaı kólik kerek, neni qaı jerge aparý kerek...

Eń birinshi ájeı habarlasyp, saıajaıyndaǵy jıhazdy úıdiń tóbesine shyǵarýǵa kómektesýimizdi surady. Bizdiń jigitter baryp, kómektesip, úıine aparyp tastady. 

Taǵy bir otbasyn sý basatyn aımaqtan qalanyń ekinshi shetine – týystaryna jetkizdik. 

Taǵy bir áıel telefon soǵyp, jylap kómek surady. Oǵan Reseıdiń Novgorod qalasyndaǵy týystary bizdiń nómirimizdi áleýmettik jeliden kórip, taýyp beripti. Múgedekter arbasyna tańylǵan áıel aıaǵyn syndyryp alǵan eken. Onyń 97 jastaǵy anasy Ekinshi dúnıejúzilik soǵys ardageri bolyp shyqty. Ol da ózdiginen júre almaıdy, tósek tartyp jatyr. Biz ol úıde eki kún jumys istedik. Muzdatqyshtyń ǵana tórteýin sý basý qaýpi bar úıden shyǵardyq. Burynǵynyń adamdary ǵoı, ishin jemis-jıdek, sańyraýqulaqpen toltyryp qoıǵan eken. Zattarynyń keıbirin shirkeýge apardyq, onda ýaqytsha oryn bólgen. 

Foto: Keıipkerden

Habarlandyrýda úsh telefon nómirin kórsetkenbiz, sonyń árqaısysyna kúnine kem degende 10 qońyraýdan túsip otyrdy. 

Sondyqtan birinshi kezekte kómektesetin eshkimi joqtarǵa, múgedekterge qoldaý bildirdik. Tek keıin basqalarynyń ótinishin oryndadyq. Tegin qyzmetti paıdalanyp qalǵysy kelgen aýqatty otbasylar da boldy.

- Jurt sý basý qaýpi bar aımaqtan shyǵarylǵan zattaryn qaıda apardy?

- Keıbiri týystaryna, dostaryna apardy. Mańdaı termen tapqan dúnıeleri ǵoı. Volonterler turǵyndarǵa zattaryn qoıýǵa oryn berip jatyr. Biz de osy maqsatqa eki garajdy bosattyq.

- Jalpy jurttyń kóńil-kúıi qalaı?

- Úreı basym. Ne bolar eken degen qorqynysh bar. Bári 2017 jylǵy sý tasqynyn eske alyp jatyr. Bıyl Sergeev sý qoımasynda tasyǵan sýdyń bıiktigi sol kezden bir metrge artyq boldy. Jyldar boıy jınaǵan dúnıesin tastap ketýge kózderi qımaıdy.

Foto: Keıipkerden

- «Vnedorojnık 4h4» avtoklýby týraly aıtyp berińizshi, qansha adam múshe, nemen aınalysasyzdar?

- Bul avtoklýb jol talǵamaıtyn kólikke qyzyǵýshylardyń basyn biriktiredi. Túrli jarystar uıymdastyramyz, ózimiz avtosporttyń osy túrinen týrnırlerge, festıvalderge qatysamyz. Jylda respýblıkalyq chempıonatty ózimizde ótkizip kelemiz. Kólikti jetildirý, jóndeýge qatysty tájirıbe almasamyz. Áleýmettik jelide paraqshalarymyz bar, jalpy topta 4 myńdaı adam bar, biraq onyń 15-20-sy ǵana belsendi.

- Arnaıy qyzmetter, áskerıler, halyq birneshe kúnnen beri bel jazbaı bógetterdi nyǵaıtyp jatyr. Sý búgin-erteń kelmek. Qalaı oılaısyz, sý tasqynyna daıynbyz ba?

- Aıtý qıyn, kelgen sýdyń mólsherine de baılanysty. Biraq bul sý tasqynymen kúres bizdiń birligimizdi nyǵaıtty. Qazir úlken sýdyń zardabyn azaıtý úshin qoldan kelgenniń bárin jasap jatyr.

Foto: Keıipkerden