Sý tasqyny: Jylyoıda nysandardy qalpyna keltirýge 21,4 mlrd teńge kerek
Parlament Májilisiniń depýtaty Ádil Jubanovtyń aıtýynsha, bul qarjy respýblıkalyq bıýdjetten suralyp otyr.
«Jylyoı aýdanynda sý tasqyny kezinde búlingen nysandardy qalypqa keltirýge qajetti qarjyny sheshý úshin Qarjy mınıstri Mádı Takıevpen arnaıy kezdestim. Óıtkeni, bul aýdandaǵy búlingen jáne qıraǵan nysandardy jóndeý úshin respýblıkalyq bıýdjetten 21,4 mlrd teńge qajet. Onyń ishinde 15,4 mlrd teńge bilim berý nysandaryna jańǵyrtýǵa jumsalady. Atap aıtqanda, apatty dep tanylǵan №5, №6 mektepterge, «Saltanat» balabaqshasyna, aýdandyq bilim bólimine jańa ǵımarat salý josparlanǵan. Al, №8, №19, №20 mektepter men «Aıgólek», «Órken» balabaqshalarynyń 2 ǵımaratyn, Qultýmıev atyndaǵy №1 saz mektebin kúrdeli jóndeý júrgiziledi. Qulsary qalasyndaǵy mektep oqýshylaryna oqýlyqtar satyp alýmen qosa, «Bolashaq» yqsham aýdanynda 160 oryndyq jańa balabaqsha, Qulsary qalasynda Bilim-ınnovatsııa lıtseıin, Shoqpartoǵaı aýylynda balabaqsha, Maıkómgen aýylynda mektep salý josparlanyp otyr», - deıdi Ádil Jubanov.
Májilis depýtatynyń aıtýyna qaraǵanda, turǵyn úı, ınjenerlik-ınfraqurylym jelileriniń qurylysyna 3,5 mlrd teńge qajet.
«Qulsary qalasynda sý tasqynynan búlingen avtomobıl jolyn qaıta qalpyna keltirý, Aqkıiztoǵaı, Turǵyzba, Qaraǵaı aýylyna kiretin joldy jóndeý jobalaryna 2,5 mlrd teńge kerek. Qarjy mınıstrliginen suralyp otyrǵan qarjynyń birqatary respýblıkalyq bıýdjetten qoldaý tabatyn bolady», - dep málim etti Ádil Jubanov.
Eske sala ketelik, budan buryn Atyraý oblysynda Jaıyq ózenindegi sý deńgeıi turaqtanǵanyn jazǵan bolatynbyz.