Sý tasqyny: Jylyoı aýdanynda 5 kásipkerlik nysan, 1 shaqyrym jol búlindi
Oblystyq jedel shtabtyń aqparatyna súıensek, Jylyoı aýdanynyń ortalyǵy – Qulsary qalasynyń 19 ýchaskesinde bógetti bekitý qolǵa alynǵan.
«Jylyoı aýdanynda 4 sáýir kúni saǵat 02:22-de Jem ózenindegi sý deńgeıi kóterilip, 2 metr 60 sm-ge jetti. Aýdan ortalyǵy – Qulsary qalasynan 12 shaqyrym jerde ornalasqan Qaraǵaı eldi mekenin sý basý qaýpi tóndi. Kúndizgi saǵat 16:00-ge deıin tasqyn sýdyń saldarynan 5 kásipkerlik nysan sý astynda qaldy. Qulsary-Dossor aralyǵyndaǵy 1 shaqyrym joldy sý shaıdy. Jol ústin basqan sýdyń eni – 1 shaqyrym, tereńdigi – 15 sm. Avtojoldyń bul bóligi kóliktiń barlyq túri úshin jabyldy» dep habarlady oblystyq jedel shtabtan.
Qaraǵaı eldi mekenin tasqyn sýdan qorǵaý úshin qum salynǵan 600 qap, 1200 tonna ınertti materıal tóselgen. Al Aqqıztoǵaı aýyldyq okrýginde 7 shaqyrym bóget salynǵan. Bógetke qum toltyrylǵan 2 myń qap qoıylǵan.
«Qazir aýdanda bógetterdi nyǵaıtý jumysy júrgizilip jatyr. Bul maqsatqa arnalǵan 37 myń 700 dana qap, 114 myń tonna ınertti materıal daıyn tur» dep málim etti oblystyq jedel shtabtan.
Eske sala ketelik, budan buryn Jylyoı aýdanynda Jem ózeniniń sýy 2 metr 53 sm-ge kóterilgen edi.
Keıin Qulsary qalasyndaǵy kópir ýaqytsha jabyldy.
Tasqyn sýdyń qaýpine baılanysty Jylyoı aýdanynda tótenshe jaǵdaı jarııalandy.
Kúndiz Qulsarydan Dossorǵa deıingi joldyń bir bóligin sý basty.
Sondaı-aq, Atyraý polıtseıleri Qaraǵaı aýylyndaǵy úılerdi táýlik boıy baqylaýǵa aldy.
Atyraý oblysynyń ákimi Serik Shápkenov búgin tótenshe jaǵdaı jarııalanǵan Jylyoı aýdanyna bardy.
Atyraýdaǵy áskerı bólimniń qyzmetshileri Jylyoı aýdanyna kómekke keldi.