Sý tasqyny jalǵasyp jatyr, alda órt qaýpi kútip tur – Tótenshe jaǵdaılar mınıstri
«Qazirgi tańda elimizde bolyp jatqan sý tasqyny Tótenshe jaǵdaılar mınıstrliginiń kez kelgen qaýip-qaterge daıyn ekenin kórsetip jatyr. Dál osy rejımde órt qaýpi kezeńinde barlyq qajetti is-sharalar uıymdastyrylady», - dedi mınıstr Úkimet otyrysynda.
Birinshiden, ár óńirde iri órttermen kúresý úshin kúshter men quraldar – respýblıka boıynsha shamamen 50 myń adam jáne 10 myńnan astam tehnıka daıydalǵan.
Qazavıaqutqarý avıatsııasynyń 19 borty turaqty daıyndyq rejıminde tur, onyń 9-y sý tógetin qurylǵylarmen jabdyqtalǵan. Aerovızýaldy barlaý úshin 120 dron bar. Sondaı-aq, jańadan qurylǵan Respýblıkalyq Orman qoryn kúzetý jáne qorǵaý qyzmetimen tyǵyz baılanys ornatylǵan. Mınıstrliktiń kelisimimen ákimdikter Tabıǵı órtterdi boldyrmaý josparlaryn bekitti.
«Ótken jyldyń kúzinde «Ormandala-2023» oqý-jattyǵýy ótkizildi. Erteń «Semeı ormany» rezervatynda Respýblıkalyq komandalyq-shtabtyq oqý-jattyǵýlar ótkizemiz. Barlyq óńirde orman sharýashylyǵy mekemeleri 53 órt-taktıkalyq oqý-jattyǵý ótkizdi. Budan basqa, mınıstrliktiń oqý ortalyqtarynda orman kúzetiniń 1 300 jumysshysy oqýdan ótti», - dep túsindirdi mınıstr.
Óńirlerde profılaktıkalyq is-sharalar jalǵasýda jáne sharýa qojalyqtaryn aralaý praktıkasy jańartyldy.
«Búgingi tańda ormandy dala alaptary men demalys oryndarynda mobıldi toptar órt qaǵıdalaryn buzǵany úshin 630 adamǵa aıyppul saldy», - dedi spıker.