Sý tasqyny: Jalaýly aýylynda salynyp jatqan 5 úıdiń qurylysy aıaqtalýǵa jaqyn

<p>PAVLODAR. KAZINFORM - Jalaýly aýylynda tasqyn sýdan zardap shekken 5 otbasyǵa jańadan salynyp jatqan úıler shilde aıynda tapsyrylady. Bul týraly Pavlodar oblysynyń ákimi Asaıyn Baıhanov habarlady.</p>

Bıylǵy sáýir aıynda sý tasqynyna baılanysty Jalaýly aýylynda tótenshe jaǵdaı jarııalanǵan edi.

Keıin sý tasqyny kezinde zardap shekken jáne komıssııanyń sheshimimen turýǵa jaramsyz dep tanylǵan 5 úı anyqtalyp, olardyń ornyna jańa qurylystar salyna bastady.

«Búgin Aqtoǵaı aýdanyna jasaǵan jumys saparymda eń aldymen Jalaýly aýylyna bardym. 5 jańa úıdi salýǵa ERG toby qoldaý bildirdi. Jumystardy jergilikti «Stalmontaj» JShS júrgizip jatyr. Aýyl turǵyndaryna arnalǵan úılerdi osy aýdannyń jaýapty kásipkeriniń salýy men úshin mańyzdy boldy. Búgingi tańda barlyq 5 úıdiń qabyrǵalary boı kóterdi. Ekeýindegi jumystar 90%-ǵa oryndaldy, bólmelerdi árleý jumystary júrgizilýde. Qalǵan úsh úıde jumystar jalǵasýda. Úılerge uzaq janatyn jylytý qazandyqtary, sýdy burýǵa arnalǵan shuńqyr ornatylady jáne ortalyq sý qubyryna qosylady. Turǵyn úılerdiń kiltterin ıelerine osy jyldyń shilde aıynyń basynda tabystaý josparlanyp otyr. Úılerdi tolyǵymen aıaqtap, adal tapsyrýdy júktedim», dep jazdy Pavlodar oblysynyń ákimi Asaıyn Baıhanov Instagram-daǵy paraqshasynda.

Buǵan qosa Jalaýly aýylynda búginde jalpy syıymdylyǵy 200 myń tekshe metr bolatyn 3 jańa qazanshuńqyrdyń qurylysy jalǵasyp jatyr. Bul bolashaqta aýyldy sý basý máselesin keshendi sheshýge múmkindik beredi. Ony da shilde aıynyń sońyna deıin aıaqtaý josparlanǵan.