Sý tasqyny: Úıine oralǵandar sany 50 myńǵa taıady

<p>ASTANA. KAZINFORM &ndash; Soltústik Qazaqstan jáne Aqtóbe oblysynda sý sorý jáne bóget qoıý jumystary júrip jatyr. Sý tasqynyna qatysty sońǵy aqparatpen Tótenshe jaǵdaılar mınıstrliginiń resmı ókili Asqar Shárip bólisti.</p>

«Respýblıka boıynsha 8 958 turǵyn úı men 2 994 aýla aýmaǵynan sýdyń baǵyty burylyp, sý soryldy. Búginde 48 945 adam úıine oraldy. Avarııalyq-qutqarý jáne sý tasqynyna qarsy jumystarǵa 11 445 adam, 1 284 tehnıka, 329 sý sorý quraly jáne 66 júzý quraly, 6 áýe kemesi jumyldyryldy», - dedi Asqar Shárip Ortalyq kommýnıkatsııalar qyzmeti alańynda ótken baspasóz máslıhatynda. 

Mınıstrlik ókiliniń sońǵy málimetinshe, Soltústik Qazaqstan oblysynyń Petropavl qalasy men Qyzyljar aýdanynda tasqyn aýmaqtarynan sý sorý jumystary jalǵasýda. Ótken táýlikte 184 úıden sýdyń baǵyty burylyp, sý sorylǵan. 

Sondaı-aq, Aqtóbe oblysy Yrǵyz aýdanynyń Quılys aýylynda Torǵaı ózeni sý deńgeıiniń birtindep kóterilýine baılanysty uzyndyǵy 2,5 shaqyrym bóget turǵyzylyp jatyr. Sonymen qatar 30 myńnan astam qap jáne 19 myńnan astam ınertti materıal tóseldi. Sý deńgeıine saǵat saıyn monıorıng júrgizilýde, jaǵdaı erekshe baqylaýda.