Sý tasqyny: úıine oralǵandar sany 40 myńǵa jýyqtady

<p>ASTANA. KAZINFORM &ndash; Sý tasqynymen kúreste el boıynsha 17 myńnan astam adam men 2 myńǵa jýyq tehnıka jumyldyryldy. Bul týraly Tótenshe jaǵdaılar mınıstrliginiń resmı ókili Asqar Shárip málim etti.&nbsp;</p>

«Respýblıka boıynsha 7 089 jeke turǵyn úı men 2 834 aýla aýmaǵynan sýdyń baǵyty burylyp, sý soryldy, 39 352 adam úıine oraldy jáne 6 552 adam evakýatsııalaý pýnktterinde qalyp otyr. Sý tasqyny bastaǵaly 13,1 mln astam tekshe metr erigen qar sýy soryp shyǵaryldy, 7,6 mln astam qapshyq jáne 1,5 mln astam tonna ınertti materıal tóseldi», - dedi Asqar Shárip Ortalyq kommýnıkatsııalar qyzmeti alańynda ótken baspasóz máslıhatynda.

Tasqyn sýmen kúreske 17 myńnan astam adam, 2 myńǵa jýyq tehnıka, 291 sý sorý quraly, 203 júzý quraly jáne 7 áýe kemesi jumyldyryldy.

«Órt qaýpi kezeńiniń bastalýyna baılanysty azamattardy tabıǵatqa shyqqanda órt qaýipsizdigi talaptaryn saqtaýǵa keńes beremiz», - deıdi ol.