Sý tasqyny týraly jalǵan aqparat taratýǵa qatysty 2 qylmystyq is qozǵaldy – ІІM

<p>ASTANA. KAZINFORM &ndash; Іshki ister mınıstrligi jalǵan aqparat taratpaýǵa shaqyryp, ol úshin jaýapkershiliktiń baryn eskertedi.</p>

«Polıtsııa aqparattyq keńistikke monıtorıng júrgizýde. Jalǵan aqparattyń taralýyna jol berilmeıdi. Búgingi tańda jalǵan aqparat taratý faktisi boıynsha Qostanaı jáne Mańǵystaý oblysynda 2 qylmystyq is qozǵaldy. Sondaı-aq, Mańǵystaý, Atyraý, Qostanaı jáne Soltústik Qazaqstan oblystarynda 4 ákimshilik is júrgizilip jatyr. Osyǵan baılanysty Іshki ister mınıstrligi azamattardy jalǵan aqparat taratpaýǵa jáne tek resmı derekkózderge senýge shaqyrady», - dedi mınıstrliktiń resmı ókili Shyńǵys Alekeshev OKQ-de ótken brıfıngide.

Onyń aıtýynsha, keı jaǵdaıda bilmestikten jalǵan aqparatty taratyp nemese bólisýi múmkin. Alaıda zańdy bilmeý jaýapkershilikten bosatpaıtynyn este ustaǵan jón.

«Jalǵan aqparat adamdarda úreı týdyryp, sý tasqyny saldaryn joıýǵa tartylǵan memlekettik organdardyń jumysyna kedergi keltiredi. Eske sala ketsek, zań boıynsha tótenshe jaǵdaı kezinde kórineý jalǵan aqparat taratý, bılik ókiline baǵynbaý jáne oǵan qatysty qorqytý nemese zorlyq-zombylyq áreketin jasaýǵa jaýapkershilik kúsheıedi. Sondaı-aq, zań boıynsha tótenshe jaǵdaı kezinde qylmystyq quqyq buzýshylyq jasaý jaýapkershilik pen jazany aýyrlatatyn mán-jaı dep tanylady», - deıdi ol.