Sý tasqyny saldary egin egý naýqany merzimine áser etpeıdi – sarapshy

<p>ASTANA. KAZINFORM &ndash; S.Seıfýllın atyndaǵy Qazaq agrotehnıkalyq zertteý ýnıversıteti Eginshilik jáne ósimdik sharýashylyǵy kafedrasynyń qaýymdastyrylǵan professory Ádilbek Noǵaev egin egý naýqanynyń merzimine sý tasqyny qanshalyqty áser etetinin aıtty.</p>

«Bıyl elimizde sý tasqyny jaǵdaıy óte qıyn boldy. Sý basqan aımaqta Soltústik Qazaqstan, Aqmola, Qostanaı, Aqtóbe oblystary sııaqty astyq sebetin óńirler boldy. Bul rette, atalǵan óńirlerdegi biraz aýyl sharýashyǵy taýaryn óndirýshiler men fermerlerde egis jumystaryn tıisti merzimde ótkizýge qatysty suraqtar týyndady. Aıta ketý kerek, jalpy sý tasqyny aldaǵy egin egý naýqanyna aıtarlyqtaı áser etpeıdi. Óıtkeni, sý tasqynynan zardap shekken aýdandarda sý basqan aýyl sharýashylyǵy alqaptarynyń aýdany sonshalyqty kóp emes», - dedi Á. Noǵaev Kazinform tilshisine bergen suhbatynda. 

Onyń aıtýynsha, sý tasqyny saldarynan egis naýqanyna kedergi keltiretin jyralar paıda boldy. Biraq osyndaı jyralar kóp bolmaǵandyqtan, egin egý jumystaryna aıtarlyqtaı áser ete qoımaıdy. 

«Sonymen qatar, zardap shekken oblystardyń keıbir aýdandarynda respýblıkalyq, oblystyq jáne jergilikti mańyzy bar joldardy sý shaıyp ketýine baılanysty jyralar paıda boldy. Olar keıbir egis alqaptaryna baratyn jolda tosqaýyl bolýy múmkin. Degenmen, ondaı jerler sonshalyqty kóp emes. Sondyqtan, astyq egetin óńirlerde sý basqan egistikter az aýmaqty alyp jatqanyn eskersek, sý tasqyny áser ete qoımaıdy», - dedi Á. Noǵaev.