Sý tasqyny: Oralda kardıologııalyq ortalyqta emdelip jatqan naýqastar kóshirildi

<p>ORAL. KAZINFORM - Oral qalasynda sý basý qaýpi tónýine baılanysty oblystyq kardıologııalyq ortalyqta em alyp jatqan naýqastar túgeldeı qalalyq kópbeıindi aýrýhanaǵa kóshirildi.</p>

Oblystyq densaýlyq saqtaý basqarmasy baspasóz qyzmetinen málim etkenindeı, barlyǵy 77 emdelýshi atalǵan aýrýhanaǵa ornalastyryldy.

Kóshirý jumystaryna basqarma basshylary, basqa da mekeme dırektorlary qatysyp, kardıologııalyq ortalyqtyń barlyq qyzmetkerleri jumyldyryldy. Sondaı-aq basqa da medıtsına mekemelerimen qatar BQO TJD jeke quramy jáne oblystyq polıtsııa departamentiniń kúshi quraldary tartyldy.

BQO TJ departamentiniń naqtylaýynsha, Shaǵan jáne Derkól ózenindegi sý deńgeıiniń kóterilýine baılanysty kardıologııalyq ortalyqqa qosa "Mıchýrın", "Veteran", "Samal 1, 2, 3", "ıAgodka", "Vıshenka", "Úmitker", "Pýteets", "Vıshnevyı sad", "Nıva", "Rostok", "Teleortalyq" saıajaı qoǵamdary men "Úmit" shaǵynaýdanyna qaýip tóndi. Bularda turatyn turǵyndarǵa evakýatsııalyq pýnktke kóshý usynyldy. Kezekshilik uıymdastyryldy. Turǵyndar kez kelgen ýaqytta kóshe alady.

Sonymen qatar Oral qalasyna irgeles ornalasqan Terekti aýdany Podstepnyı aýylynda da kúrdeli jaǵdaı qalyptasyp, osyndaı jumystar júrgizilýde.

Oral qalasy ákimdiginiń málimetine sáıkes qazirgi ýaqytta 160-taı adam evakýatsııalyq pýnktterge ornalasqan.

Eske sala keteıik, budan buryn BQO-nyń Kaztalov aýdanynda ózen tasyp, 22 aýyldy sý basýy múmkin ekendigin jazǵan bolatynbyz.