Sý tasqyny: Oral turǵyndary qaýipsiz aımaqqa kóshiriledi
«Jaıyq ózeniniń boıyna jaqyn ornalasqan Oral qalasynda jáne oblystyń 4 aýdanynda sý tasqyny qaýpine oraı kúrdeli jaǵdaı qalyptasyp otyr. Búgingi aqparatqa sáıkes, Reseı Federatsııasynan sýdyń mol kólemi 2-3 kúnde oblysymyzǵa jetedi. Qaýipti deńgeı 8,5 metr bolsa, búgin Jaıyqtyń deńgeıi 8 metrge jýyqtady. Qazir tótenshe jaǵdaı qyzmeti, kúshtik qurylymdar mamandary táýlik boıy jumys istep jatyr», - dedi E. Tatken Ortalyq kommýnıkatsııalar qyzmetindegi baspasóz máslıhatynda.
Onyń aıtýynsha, sý tasqynyna qarsy jumystarǵa óńirimizden jáne respýblıkamyzdyń basqa aımaqtarynan jalpy sany 6 389 adam jáne 1403 tehnıka, onyń ishinde 645 birlik arnaıy tehnıka jumyldyryldy. Sondaı-aq eriktiler men qarapaıym azamattar da qoldan kómekterin aıamaı jatyr.
«Jańa ǵana maǵan aqparat kelip tústi. Qala ákimdigi dál qazir turǵyndarǵa úndeý jasapty. Reseıdiń Orynbor aımaǵynan sý 2-3 kúnde keletindikten, Oral qalasyndaǵy qaýipti aımaqtardyń turǵyndary dereý qaýipsiz jerlerge kóshirilýi tıis ekenin habarlanǵan. Atap aıtqanda, Oral qalasyndaǵy Jaıyq ózeni boıyndaǵy saıajaılardyń, sý basý qaýpi joǵary Kýrenı, Starıtsa, Komıntern aýdandarynyń turǵyndary shuǵyl arada evakýatsııalanýy qajet. Sýdyń mol kólemi kez kelgen ýaqytta jetip, úılerdi sý basýy múmkin degen habar tarap jatyr. Osyǵan baılanysty oblys ortalyǵynda evakýatsııalyq pýnktter jasaqtalǵan. Olar turǵyndardy kúni-túni úzdiksiz qabyldaıdy», - dedi baspasóz qyzmetiniń basshysy
Onyń sózine qaraǵanda, oblys boıynsha sý tasqyny bastalǵaly beri 14 myńǵa jýyq adam evakýatsııalandy. Evakýatsııalyq pýnktterge 2 myńnan astam adam ornalasty. Qalǵan turǵyndar ózderiniń jaqyndary men týysqandarynyń úılerine kóshti.
«Oral qalasy men Aqjaıyq, Bórli, Terekti, Báıterek aýdandarynda sý tasqynyna qarsy jumystar táýlik boıy atqarylyp jatyr. Oblys ákimi Narıman Tóreǵalıev barlyǵyn óz baqylaýynda ustap otyr. Ózen jaǵasyndaǵy eldi meken turǵyndaryn qaýipsiz jerge kóshirý jumystary jalǵasady», - dedi Erhan Tatken.
Budan buryn habarlanǵandaı, qaýip Reseı aýmaǵynan keletin sýdan bolýy múmkin ekeni aıtyldy. Úlken sý aǵyny oblys aýmaǵyna 15-20 sáýirde kelýi yqımal.